नेकपा एमालेका सचिव याेगेश भट्टराई अहिले पूर्व नेता माधवकुमार नेपाल र उनकाे पार्टी नेकपा एकीकृत समाजवादी विरूद्ध चर्काे अालाेचनामा उत्रिएका छन् । पहिले माधव पक्षमा रहँदा अध्यक्ष केपी शर्मा वलीले बैगुनी केटाे भनेका थिए । अहिले याेगेशलाई एमाले बाहेकका दलका कार्यकर्ताले बैगुनी केटाे भन्दै सत्ताेसराप गरिरहेकाे सामाजिक सञ्जालमा भेटिन्छन् ।

विगतमा माधवकुमार नेपालको पक्षमा रहेकामध्ये योगेश भट्टराई मात्र त्यस्ता नेता हुन् जसले महत्वपूर्ण जिम्मेवारी पाएका छन् । उनले प्रचार विभागको जिम्मेवारी पाएसागै १०औं महाधिवेशन पूर्व सार्वजनिक रुपमा बोल्न थालेका छन् ।

भट्टराईले माधवकुमार नेपालविरुद्ध समेत आक्रामक अभिव्यक्ति दिएका छन् । जसमध्ये एउटामा उनले नेकपा एसको नाम नलिई माधव नेपालको दल अवैध सम्बन्धबाट जन्मिएकाले निम्तो नदिने बताए । यसको निकै आलोचना भएको थियो । भट्टराईले त्यसपछि खुट्टामा हानेको टाउकोमा लागेको बताए ।

नेकपा एमाले विभाजनपूर्व नै भट्टराई अध्यक्ष केपी शर्मा ओलीसँग नजिकिएका थिए । उनले माधव नेपाल समूहमा बैठक बसेपनि साथ दिइरहेका थिएनन् ।

अहिले भट्टराई महाधिवेशन नजिकिदै गर्दा माधव नेपालविरुद्ध आक्रामक बन्नुमा फेरि महत्वपूर्ण पदमा स्थान पक्का गर्नु हो । एमालेभित्र ओलीको एकल वर्चश्व जस्तै छ । उनले चाहेको व्यक्ति मात्र पदाधिकारी हुन सक्ने परिस्थिति छ ।

नवौं महाधिवेशनमा सचिव निर्वाचित भट्टराईले त्योभन्दा माथिको पद दाबी गर्ने निश्चित छ । उनी उपमहासचिव वा महासचिवका दाबेदार हुन् । उपाध्यक्षमा जाने सम्भावना पनि छ । तर, त्यसका लागि ओलीको ग्रीन सिग्नल अनिवार्य छ । त्यसका लागि पनि उनलाई खुशी पार्न भट्टराई कडा अभिव्यक्ति दिन थालेका छन् ।

माधव नेपालको साथ छाडेकामध्ये भीम रावल, अष्टलक्ष्मी शाक्य ओलीको आलोचना गरिरहेका छन् । युवराज ज्ञवाली, सुरेन्द्र पाण्डे, गोकर्ण बिष्ट, रघुजी पन्त, भीम आचार्यलगायत नेताहरु मौन जस्तै छन् ।