पोखरा  ।    पोखराको लेखनाथमा मजदुरी काम गरी बस्ने सुनसरी जिल्ला धरान उपमहानगरपालिका घर भएका २० वर्षीय रोजन राईको हत्यामा संग्लग्न व्यक्तिलाई १५ वर्षपछि प्रहरीले बहराइनबाट पक्राउ गरी नेपाल ल्याएको छ ।

पक्राउ पर्नेमा लेखनाथ सातमुहाने ठेगाना भएका ४६ वर्षीय अशोक गुरूङ रहेका छन्। प्रहरीका अनुसार २०६३ बैशाख २९ गते बेलुकी कुटपिटबाट सख्त घाइते भएका रोजन राईको उपचारको क्रममा २०६३ जेठ २ गते मृत्यु भएको थियो ।

घटनामा संलग्न अशोक गुरुङ घटनापश्चात वैदेशिक रोजगारीको सिलसिलामा बहराईन गएको र उनीविरुद्ध अन्तर्राष्ट्रियस्तरमा खोजतलास एवं पक्राउको लागि जिल्ला प्रहरी कार्यालय कास्कीको अनुरोधमा २०७८ मंसिर २७ गते ईन्टरपोल महासचिवालयबाट ‘रेड नोटिस’ जारी गरिएकोमा उनी बहराईनमा पक्राउ परेका हुन्।

उनलाई सम्बन्धित कसुरमा कारवाही गर्ने/गराउने प्रयोजनार्थ प्रहरी प्रधान कार्यालय ईन्टरपोल शाखाबाट खटिएको प्रहरीले मंगलबार नेपाल ल्याएर थप अनुसन्धान तथा आवश्यक कानुनी कारवाहीको लागि जिल्ला प्रहरी कार्यालय कास्कीलाई बुझाउने जनाएको छ ।

पोखरामा १५ वर्ष अघिको त्यो हत्याः मार्ने पक्रिए, मारिनेको आफन्त अत्तोपत्तो छैन