काठमाण्डौ। बतास समूहले भाडामा लिएर सञ्चालन गर्दै आएको पशुपति धर्मशालामा पशुपति क्षेत्र विकास कोषले गैरकानुनी रूपमा लगाएको ताला खोल्न जिल्ला अदालत काठमाडौँले आदेश दिएको छ । बतास समूह अन्तर्गतको होटेल आनन्दसँग भएको करार सम्झौता एकलौटी रूपमा भङ्ग गर्ने कोषको निर्णयका विरुद्ध अदालतमा पेस भएको मुद्दामा सुनुवाई गर्दै जिल्ला अदालत काठमाडौँले शुक्रवार यस्तो अन्तरकालीन आदेश दिएको हो ।

शुक्रबारमात्रै पशुपति क्षेत्र विकास कोषले नेपाल–भारतमैत्री धर्मशालाभित्र रहेको होटल आनन्दमा ताला लगाएको थियो । संस्कृति पर्यटन तथा नागरिक उड्डयन मन्त्री प्रेमबहादुर आलेको निर्देशनमा कोषले नेपाल–भारत मैत्री पशुपति धर्मशालाको मूल गेटमा शुक्रवार बिहान ताला लगाएको हो ।

शुक्रवार बिहान १० बजे पशुपति धर्मशालामा सिल गर्ने कार्यक्रम रहेकाले धर्मशालामा रहेका सामानको मुचुल्काको साक्षी बस्नका लागि पशुपति क्षेत्र विकास कोष मार्फत वडा कार्यालयलाई पत्रसमेत लेखेको थियो । तर, काठमाडौँ महानगरपालिका वडा न. ८ का वडाध्यक्ष दिनेशकुमार डङ्गोलले धर्मशाला सम्बन्धित मुद्दा अदालतमा विचाराधिन रहेकाले आफू उक्त धर्मशालाका सामानको मुचुल्काको साक्षी बस्न नसक्ने बताएका थिए।