पोखरा । गठबन्धनमा असहमति जनाउँदै विरोधमा उत्रिएका पोखराका काँग्रेस कार्यकर्ताले गण्डकी प्रदेश कार्यालयमा तोडफोड गरेका छन् आफ्नो वडामा अरू पार्टीलाई अध्यक्ष दिएको भन्दै पोखरा १८ र २४ का कार्यकर्ताले पार्टी कार्यालय घेराउ गर्दै तोडफोडमा उत्रिएका हुन् ।

उनीहरूले प्रदेश सभापति शुक्रराज शर्माको कार्यकक्षमा रहेको फर्निचर फुटाएका छन् । त्यसअघि, माटेपानीमा भएकाे पत्रकार सम्मेलन तथा घाेषणापत्र सार्वजनिक समाराेह विथाेल्न उनीहरूले गेटमै ताला लगाएर नाराबाजी गरेका थिए । सत्ता गठबन्धनले पोखरा महानगरपालिकाको मेयर र उपमेयर उम्मेदवारकाे घोषण पत्र सार्वजनिक गर्ने कार्यक्रम घण्टाैँ विथाेलेका थिए ।

उनीहरुले गण्डकी प्रदेशका कानून, सञ्चार तथा प्रदेश सभा मामिला मन्त्री बिन्दु कुमार थापामाथि कालोमोसो दल्ने धम्कीसमेत दिएका थिए । कास्की सभापति किशाेरदत्त बराललाई कार्यक्रम स्थलमै प्रवेश गर्न दिएनन् ।

काँग्रेसबाट उम्मेदवारी दिएका उम्मेदवारलाई माथिको निर्देशन भन्दै फिर्ता लिन आग्रह गरेपछि कार्यकर्ता आक्रोशित भएका हुन् ।तोडफोडमा उत्रिएका २३ जना कार्यकर्तालाई प्रहरी नियन्त्रणमा लिएका प्रहरीले जनाएको छ । आफैले तोडफोड गरेको स्वीकारेका कारण उनीहरूलाई पक्राउ गरिएको कास्की प्रहरी प्रवक्ता डीएसपी सुन्दर तिवारीले जानकारी दिए ।

काँग्रेसले यसअघि ३३ वटै वडामा आफ्नो प्यानल उठाएको थियो । तर, अहिले गठबन्धन हुने ठाउँमा उम्मेदवारी फिर्ता लिन लगाएको छ ।