काठमाडौं । बलात्कारसम्बन्धी मुद्दाको हदम्याद हटाउन सरकारकाले विधेयक पेस गरेका बेला सदनमा महिला सांसदले नै यसको विरोध गरेकी छन् । एमाले सांसद गंगा चौधरीले सोमबार प्रतिनिधिसभामा सो विधेकयमाथिको छलफलमा मन मिलुन्जेल प्रेम सम्बन्ध र मन नमिलेपछि बलात्कारका मुद्दा लगाउने प्रवृति बढेको दाबी गरिन् ।

पूर्वसभामुख कृष्णबहादुर महरा र नायक पल शाह प्रकरणको उदाहरण दिंदै उनले हदम्याद नराखे मन मिलेसम्म ‘लभ’ भन्ने र मन नमिलेपछि ‘बलात्कार’ भन्ने प्रवृत्ति बढ्ने बताइन् । उनले भनिन्, ‘यसभन्दा पहिले पनि सम्मानित सदनमा बसेका पूर्वसभामुखको घटना पनि हामीले हेरेका छौं । जबसम्म स्वार्थ मिल्यो केही कसैलाई पत्तो थिएन । जब स्वार्थ मिलेन त्यो ठाउँमा बलात्कारको संज्ञा दिएर उहाँलाई ६-६ महिनासम्म जेलमा कोचियो ।
सांसद चौधरीले नायक पल शाहको विषयमा पनि यही अवस्था सृजना भएको उनले दाबी गरिन्। चौधरीले भनिन् – ‘जबसम्म मन मिल्यो तबसम्म लभको संज्ञा दिने, आफ्नो स्वार्थ पूरा भएन भने बलात्कारको संज्ञा दिने ? यदि हदम्याद राखिएन भने मुद्दाको चाङ लाग्छ । अनि न्याय कसरी पाउँछन् ? यो दृष्टिकोणबाट पनि हामीले हेर्न जरुरी छ ।’