काठमाडौं । सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले दलालहरुलाई लखेट्न नसक्ने होकि भन्दै आशंका ब्यक्त गरेका छन् । आइतबार राजधानीमा आयोजित कार्यक्रममा प्रचण्डले कम्युनिस्ट आन्दोलन र पार्टीमा व्यत्तिवाद हावी भएको बताए ।

‘थोरै हुँदा संसारै जितिन्छ भनेको जस्तो मान्ने हामी अहिले सबै हुँदा केही पनि सकिँदैन क्यारे भने जस्तो किन भएको छ ?’ उनले प्रश्न गरे । उनले अघि भने, ‘हामी ८/९ लाख कार्यकर्ता छौं । यत्रो कार्यकर्ताको पंक्ति हुँदा जे पनि गर्न सक्छु भनेर आँट आउनुपर्ने । दलाल नोकरशाही एकैदिन लखेट्न सक्नुपर्ने तर, सक्दैनौं जस्तो लाग्छ ।’

पार्टी र कम्युनिस्ट आन्दोलनमा हार्दिकता कम हुँदै गएको पूर्वप्रधानमन्त्री समेत रहेका प्रचण्डको विश्लेषण छ । ‘साथीहरु देख्दा रिस उठे जस्तो, देख्न नपरे पनि हुन्थ्यो, बोल्नै नपरे पनि हुन्थ्यो किन भएको छ ?’ उनले भने, केही मिस भएको छ ।’