किरण श्रेष्ठ, तनहुँ । तनहुँको बेलभञ्ज्याङ र मुसेखोलामा फेला परेको शंकास्पद वस्तुलाई नेपाली सेनाको टोलीले निष्क्रिय पारेको छ ।

पृथ्वी राजमार्गअन्तर्गत पुलमा सोमबार बिहान भेटिएको शंकास्पद वस्तु झण्डै दुई घण्टाको पछि सेनाको टोलिले निष्क्रिय पारेको जिल्ला प्रहरी कार्यालय तनहुँका डिएसपी लिलाराज लामिछानेले जानकारी दिए ।

बम डिस्पोजल नेपाली सेनाको टोलीले सोमबार बिहान साढे सात बजेतिर शंकास्पद वस्तु निष्क्रिय पारेको प्रहरीले जनाएको छ ।

बन्दिपुर-१ बेलभञ्ज्याङमा भेटिएको शंकास्पद वस्तु कित्लीमा तार सहित बारुद राखिएको अवस्थामा भेटिएको प्रहरीले जनाएको छ । उक्त शंकास्पद वस्तु सेनाको टोलिले निष्क्रिय पारिसकेको छ ।

त्यस्तै व्यास-१२ मुसेखोलामा भेटिएको शंकास्पद वस्तुमा राईसकुकरमा माटो र गिट्टी राखिएको अवस्थामा भेटिएको तनहुँ प्रहरीले जनाएको छ ।

उक्त शंकास्पद वस्तु सेनाको टोलिले निष्क्रिय पारिसकेको छ । आबुखैरेनी र दमौलीबाट गएको सेनाको टोलीले सो शंकास्पद वस्तु निष्क्रिय पारेको हो ।

नेपाल बन्दको प्रभाव

विप्लव नेतृत्वकाे नेकपाले आह्वान गरेको नेपाल बन्दले तनहुँको दमौली लगाएत मुख्य बजार बन्द रहेको छ । औषधि पसल, हाेटल, एम्बुलेन्स, माेटरसाइकल भने संचालनमा रहेका छ्न ।

न्युन संख्यामा सवारी साधन संचालनमा

पृथ्वी राजमार्गमा बम भेटिएपछि गाडी कम चलेका छन् । यात्रु बसलाई सुरक्षाकर्मीले स्कटिङ्ग गरेका छन् ।

पृथ्वी राजमार्ग अन्तरगत तनहुँको दुई वटा स्थानमा शंकास्पद वस्तु भेटिएपछि सवारी साधन केही समयको लागी रोकिएको र अहिले संचालनमा आइसकेको जिल्ला प्रहरी कार्यालय तनहुँका डिएसपी लिलाराज लामिछानेले जानकारी दिए ।

प्राइभेट सवारी, मोटरसाइकल, ट्रक र रात्रीबसहरु भने संचालनमा रहेको प्रहरीले जनाएको छ ।

सुरक्षा कडा बनाइएको र सादा पोसाकमा प्रहरी समेत परिचालन गरिएको लामिछानेले जानकारी दिए । त्यस्तै मोबाइल गस्ती समेत बढाइएको उनले बताए ।