अहिले युट्युबमा ट्रेण्डिङमा रहने विषयमध्ये पर्छ ‘स्ट्याण्ड अप कमेडी शो’। युट्युबबाटै कति स्टार पनि बने । संघीय राजधानी काठमाण्डौका युवाहरु समूह -समूहमा यस्ता शो खिच्दै युट्युबमा अपलोड गर्ने गर्छन । यसलाई अब पोखराका युवाहरुले पनि निरन्तरता दिने भएका छन् । पोखरामा पनि युवाहरुको एक समूहले यो शो आयोजना गर्ने भएको छ । उनीहरु ‘स्ट्याण्ड अप कमेडी क्लब पोखरा’ नामक समूह बनाएरै अघि बढेका छन् ।

आज ९शुक्रबार लेकसाइडस्थित अल्टिट्युड रेष्टुरेन्ट एण्ड बारमा बेलुका ७ बजेबाट शो गरिने आयोजक मध्येका एक सुन्दर सुवेदीले जानकारी दिए । उनका अनुसार पोखराका ५ युवक र १ युवतीले त्यहाँ प्रस्तुति राख्नेछन् । यो शो सफल भएमा यसलाई निरन्तरता दिने र स्ट्याण्ड अप कमेडी कलाकारहरुलाई बटुल्दै अगाडि बढ्ने आयोजकको योजना रहेको छ ।

स्ट्याण्ड अप कमेडी शो संयुक्त राज्य अमेरिकाको थोरै मौलिक कलामध्ये एक हो । नेपाली शैलीमा वक्तृत्वकला जस्तै जस्तै यसमा हाँस्य शैली हाबी हुन्छ । चोटिलो शब्द, व्यंग्यात्मक वाण हान्ने यो शोमा मञ्चमा उभिएर बोलेरै मान्छे हँसाउनुपर्ने हुन्छ । खुबी भएकाहरु ठूलै नाम दाम कमाउन सक्नेछन् । पछिल्लो समय यस्ता शोमा अपाच्य शब्दको प्रयोग हुने गरेको पाइन्छ । तर पोखरामा हुने शोमा यसलाई स्थान नदिइने भएको छ ।