Gandak News
Our News Your Views

उत्तर कोरियामा कोही पनि संक्रमित नभएको किम जोङ उनको दाबी

  • 459
    Shares

इबेट टेन/ बीबीसी । उत्तर कोरियाले आफ्नो देशमा एकजना पनि कोरोनाभाइरसद्वारा संक्रमित नभएको दाबी गरेको छ । यो दाबीमाथि अब शंका बढ्दै गएपछि प्रश्न उठ्न थालेको छ ।

उत्तर कोरियाले सीमा बन्द गर्ने आफ्नो कठोर निर्णयका कारण कोरोनाभाइरस आफ्नो देशसम्म नआइपुगेको बताउँदै आएको छ ।

तर दक्षिण कोरियामा अमेरिकी सेनाका वरिष्ठ कमान्डरले उत्तर कोरियाको यो दाबीलाई झुटो र असम्भव बताएका छन् ।

यद्यपि, उत्तर कोरियाका एक विशेषज्ञले बीबीसीसँगको कुराकानीमा त्यहाँ संक्रमित नै छैनन् भन्नु गलत भएको बताउँदै ठूलो स्तरमा संक्रमण फैलने आशंका भने कम भएको बताएका छन् ।

जोन हप्किन्स युनिभर्सिटीको आँकडा अनुसार हालसम्म संसारभरी कोरोनाभाइरसको संक्रमितको संख्या १० लाख नाघिसकेको छ भने ५३ हजार ६९ को मृत्यु भइसकेको छ ।

उत्तर कोरियामा सेन्ट्रल एन्टी–एपिडेमिक मुख्यालका निर्देशक पाक म्योङ–सूले शुक्रबार समाचार एजेन्सी एएफपीसँग भने, ‘उत्तर कोरियामा अहिलेसम्म एकजना व्यक्ति पनि संक्रमित छैनन् । ’

उनले थपे, ‘हामीले संक्रमण रोक्नका लागि पहिलेदेखि नै सक्रिय र वैज्ञानिक कदम उठाएका छौं । जस्तै विदेशबाट आएका व्यक्तिहरुको खोजी र उनीहरुलाई क्वारेन्टिनमा राख्नु । हामीले सबै सामानलाई पूर्ण रुपमा स्यानिटाइज गर्यौं, आफ्ना सबै जल, थल र वायु सीमालाई बन्द गर्यौं ।’

के उत्तर कोरियाको दाबी सही होला ?

दक्षिण कोरियामा अमेरिकी सेनाका कमान्डर जनरल रोबर्ट अबराम्सले उत्तर कोरियाको यी दाबीलाई गलत बताएका छन् ।

उनले सीएनएन र भोइस अफ अमेरिकालाई संयुक्त रुपमा दिएको अन्तर्वार्तामा भने, ‘हामीले जुन जानकारी पाएका छौं, त्यसलाई आधार मानेर नै म भन्न सक्छु कि यो असम्भव दाबी हो ।’

यद्यपि उनले उत्तर कोरियामा कति संक्रमित होलान् भनेर किटान गरेर भन्न नसकिने बताएका छन् ।

अमेरिकी वेबसाइट एनक न्यूजका म्यानेजिङ एडिटर ओलिव हटमले पनि उत्तर कोरियामा संक्रमित छन् भन्दै दाबी गरे ।

उनले भने, ‘उत्तर कोरियामा एकजना पनि संक्रमित छैनन् भन्नु गलत हो किनभने यहाँको सीमा दक्षिण कोरिया र चीनसँग जोडिन्छ । उत्तर कोरियाको चीनसँग जुन प्रकारको व्यापारिक सम्बन्ध छ त्यो हेर्दा कोरोनाभाइरसको कुनै पनि संक्रमित छैनन् भन्ने दाबी गलत भएको जस्तो लाग्छ ।’

यद्यपि, उनले पनि उत्तर कोरियामा संक्रमण व्यापक रुपमा नफैलिएको हुन सक्ने बताएका छन् ।

उत्तर कोरियाले संक्रमण संकटको सामना कसरी गर्यो ?

यसमा कुनै शंका छैन कि उत्तर कोरियाले कोरोनाभाइरसको संक्रमणविरुद्ध अन्य देशको तुलनामा अत्यधिक फूर्तीले प्रभावकारी कदम उठाएको छ । उत्तर कोरियाले जनवरीको अन्त्यमा नै आफ्ना सीमा सील गरेको थियो र पछि प्योङ्गयाङमा आएका सयौं विदेशीलाई क्वारेन्टिनमा राखेको थियो । त्यतिबेला चीनमा संक्रमण निकै तीब्र रुपमा बढिरहेको थियो ।

एनके न्यूजको रिपोर्ट अनुसार उत्तर कोरियाले आफ्ना १० हजार नागरिकलाई आइसोलेशनमा राखेको थियो र ५ सय बढी जनता अहिले पनि क्वारेन्टिनमा छन् ।

Pokhara Internet
प्रतिक्रिया
लोड हुँदै ...

छुटाउनुभयो कि ?

साताको ट्रेन्डिङ

महिनाभर सर्वाधिक पढिएको