म्याग्दी र मुस्ताङलाई राष्ट्रिय राजमार्गसँग जोड्ने मालढुङ्गा–बेनी सडक कालोपत्र गरिने

म्याग्दी र मुस्ताङलाई राष्ट्रिय राजमार्गसँग जोड्ने मालढुङ्गा–बेनी सडक कालोपत्र गरिने

pitch kalopatre

म्याग्दी र मुस्ताङलाई राष्ट्रिय राजमार्गसँग जोड्ने कालीगण्डकी करिडोरअन्तर्गत मालढुङ्गा–बेनीसम्मको सडकलाई दुई लेनमा विस्तार गरी कालोपत्र गर्ने योजना अघि बढाइएको छ ।

बहुवर्षीय ठेक्कामार्फत सडक निर्माण गर्न लागिएको हो । म्याग्दीको सदरमुकाम बेनी जोड्ने छोटो दूरीको यो सडक जीर्ण हुँदा सर्वसाधारणले सास्ती भोग्दै आएका थिए । यस सडकलाई कालिगण्डकी करिडोरअन्तर्गत समावेश गरेर सडक निर्माण थालिएपछि स्थानीयवासी उत्साहित भएका छन् ।

मुस्ताङको कोरला नाकादेखि दक्षिणको सुनौलीसम्म जोड्ने कालीगण्डकी करिडोरअन्तर्गत पर्वतको मालढुङ्गादेखि म्याग्दीको सदरमुकाम बेनीसम्मको खण्डका रुपमा यो सडकलाई कायम गरेर सडक निर्माणलाई अगाडि बढाइएको हो । मालढुङ्गादेखि बेनीसम्म १३ किलोमिटर साँघुरो सडकलाई चौडा पारी मध्यपहाडी सडककै मोडेलमा निर्माण गरिने भएको छ ।

सडक निर्माणका लागि एपेक्स खड्का कृष्ण जेभी बाँकेलाई छनौँट गरी सम्झौताको चरणमा रहेको आयोजनाले जनाएको छ । चैत महीनाभित्र निर्माण व्यवसायीसँग ठेक्का सम्झौता भई वैशाखबाट काम शुरु गर्ने तयारी रहेको बेनी–जोमसोम कोरला सडक आयोजनाका प्रमुख रामेश्वर लम्सालले बताए ।

उनका अनुसार तीन वर्षभित्र सडक निर्माण सम्पन्न गरिने लक्ष्य छ । कूल रु ७२ करोड लागत अनुमान गरिएको भए पनि सबैभन्दा कम मूल्यको प्रस्तावलाई स्वीकृत गरेर रु ५२ करोड ८६ लाखमा ठेक्का सम्झौता हुने आयोजनाले जनाएको छ । सडक निर्माणका लागि अर्थमन्त्रालयले बहुवर्षीय ठेक्काका लागि यसै वर्ष स्वीकृति दिएको थियो । यसअघि म्याग्दीको बेनीदेखि मुस्ताङको जोमसोम हुँदै कोरलासम्म र मालढुङ्गादेखि बागलुङ र पर्वततर्फबाट समानान्तररुपमा सडकको काम भइरहेको थियो ।

मालढुङ्गाबाट बेनी पुग्नका लागि मालढुङ्गा–बेनी सडक वा बागलुङतर्फबाट कालीगण्डकी किनारै किनार सडक बनाउने भन्ने विषय अन्योलमा थियो । विसं २०४८ मा म्याग्दीको सदरमुकाम बेनी जोड्नका लागि यो सडक ‘कामका लागि खाद्यान्न’ कार्यक्रमअन्तर्गत शुरु भएको थियो । त्यसपछि मालढुङ्गा–बेनी–दरबाङ–सडक आयोजनाका रुपमा यसमा काम भएको थियो भने पछिल्लो समय डिभिजन सडक कार्यालय बागलुङ मर्मतको काम गर्दै आएको छ । सडक स्तरोन्नति भएपछि मुस्ताङ जाने पर्यटक र पर्वत, म्याग्दी र मुस्ताङका बासिन्दा प्रत्यक्षरुपमा लाभान्वित हुने अपेक्षा गरिएको छ ।

प्रतिक्रिया

लेखकको बारेमा

रासस

रासस

राष्ट्रिय समाचार समिति नेपालकाे सरकारी समाचार संस्था हाे ।

ट्रेन्डिङ


This will close in 2 seconds