हामीमाझ होली पर्व नजिकिएको छ । उमंगको यो पर्व पहाडी जिल्लामा चैत १५ गते र तराईका जिल्लामा चैत १६ गते मनाइदैछ । तर रंगहरुको यो पर्वमा केहि सावधानी भने अपनाउनु पर्दछ ।

अन्यथा जथाभावी रंग खेल्दा आँखाको दृष्टि गुम्ने, कानको जाली फुट्ने, एलर्जी, दम, छालासम्बन्धी विभिन्न समस्या आउनसक्छ । लोला प्रहारले आँखा, कानलाई समस्यामा पार्न सक्छ । साथै रंगले दमका रोगीहरूलाई बढी दुःख दिन्छ ।

स्मरण रहोस्, होलीमा खेलिने रंग, अबिर आदिमा प्रायः रसायन मिसाइएको हुन्छ । जसको प्रयोगले छाला पोल्ने वा छालाको रंग परिवर्तन हुने वा छाला सुक्खा हुने समस्या देखिन सक्छ । रंगको बढी उपयोगले छाला सुक्खा हुने तथा रंगमा भएका रसायनले छालाको भित्री सतहलाइ नोक्सान पु-याउँछ ।

होलीको रंगमा, हरियो रंग कपर सल्फेट (नीलो तुथो), बैजनी रंग क्रोमियम आयोडाइड, चम्किलो रंग एल्मुनियम ब्रोमाइड, नीलो रंग पर्सियन ब्लु र रातो रंग मर्करी सल्फेटबाट बन्छ । यी रसायनहरू मानव स्वास्थ्यका लागि अति हानिकारक हुन्छन् ।

हरियो रंगले आँखामा एलर्जी वा अस्थायी अन्धोपन निम्त्याउन सक्छ । साथै छाला रोग पनि हुन सक्छ । यस्तै, बैजनी रंगले दम र एलर्जी हुन सक्छ ।

चम्किलो रंग क्यान्सरको कारक बन्न सक्छ । नीलो रंगले छालामा एलर्जी गराउन सक्छ । रातो रंगले छालाको क्यान्सर हुन सक्छ । त्यसैले होलीमा रंग खेल्दा विशेष सावधानी अपनाउन आवश्यक छ । साथै अरुलाई असर नपर्ने गरी होली खेल्नु पर्दछ ।