कोरोना संक्रमणका कारण सोमबार पनि १२ जनाको मृत्यु पुष्टि

गण्डक न्यूज सोमबार, २७ वैशाख २०७८

२७ वैशाख २०७८

पोखरा – महामारीको रुपमा फैलिएको दोश्रो लहरको कोरोना भाइरसको कारण पछिल्लो समय गण्डकीमा ज्यान गुमाउनेको संख्या दिनानुदिन वृद्धि हुँदै गइरहेको छ।

गण्डकीमा आइतबार मात्रै कोरोना संक्रमण भइ उपचारका क्रममा १२ जनाले ज्यान गुमाएकोमा सोमबार पनि उही संख्यामा प्रदेशका विभिन्न जिल्लाका अस्पतालहरुमा उपचारकै क्रममा संक्रमितहरुले ज्यान गुमाएका छन्।

गण्डकी प्रदेश स्वास्थ्य निर्देशनालयको दैनिक कोभिड सम्बन्धी अपडेट अनुसार आज जारी पहिलो, चौथो र नवौं विज्ञप्ति अनुसार थप १२ जनाको मृत्यु पुष्टि भएको छ ।

आज मृत्यु पुष्टि हुनेमा कास्की जिल्ला पोखरा महानगरपालिकाका दुई जना, पर्वत जिल्लाका दुई जना, स्याङ्गजा जिल्लाका चार जना, तनहुँ जिल्लाका एक जना, म्याग्दी जिल्लाका दुई जना छन् भने,एक जना पोखरामा उपचाररत रुपन्देही जिल्ला बुटवल उपमहानगरपालिकाका छन् ।