नेकपा एमाले निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) का उपाध्यक्ष रश्मि आचार्यले आफूले अखिलको विद्यार्थी राजनीतिमा २८ वर्ष बिताएको उल्लेख गरेका छन् ।

२२ औं सम्मेलनबाट निर्वाचित उपाध्यक्ष आचार्य अध्यक्ष नविना लामा समानुपातिक सांसद चयन भएपछि नै अध्यक्षका लागि प्रमुख दाबेदार थिए । यद्यपी, पार्टी निर्देशनमा महासचिव ऐन महरलाई अध्यक्ष बनाइयो । अहिले निर्वाचित उपाध्यक्ष आचार्य, महेश वर्तौला र सैलेश लामा बाहिरिएका छन् । उपाध्यक्ष सुनिता बराललाई अध्यक्ष चयन गरिएको छ ।

चैतमा हुन गइरहेको २३ औं महाधिवेशनबाट बराललाई अध्यक्ष र समिक बडाल महासचिव बनाउने गरी केन्द्रीय कमिटी हेरफेर गरिएको हो । संगठनका प्रवक्ता तथा हालका सचिव आरसी लामिछाने वरिष्ठ उपाध्यक्ष चयन भएका छन् । अध्यक्षको लागि रश्मी आचार्य र महेश बर्तौला पनि आकांक्षी थिए । पूर्वअध्यक्ष नविना लामा, रश्मी आचार्य आफूहरुलाई अन्याय भएको भन्दै अनेरास्ववियूको बैठकमा अनुपस्थित भएको बताइएको छ ।

रश्मि आचार्यले एक प्रेस विज्ञप्ति जारी गर्दै आफू अब विद्यार्थी राजनीतिबाट पार्टी राजनीतितर्फ प्रवेश गरेको उल्लेख गरेका हुन् ।