पाकिस्तानको पञ्जाब प्रान्तमा १४ वर्षीय बालकले अनलाइन गेम ‘पब्जी’ को प्रभावमा आफ्नी आमा‚ दाजु र दिदीबहिनीसहित सम्पूर्ण परिवारको हत्या गरेका छन् ।

गत हप्ता लाहोरको काहना क्षेत्रमा ४५ वर्षीया स्वास्थ्यकर्मी नाहिद मुबारक, उनका २२ वर्षीय छोरा तैमुर र १७ र ११ वर्षका छोरीको शव भेटिएको थियो ।

प्रहरीले विज्ञप्तिमा नाहिद मुबारकका १४ वर्षीय छोरा कुशल रहेको र उनले हत्या गरेको खुलासा गरेको छ। बयानका अनुसार ‘केटा पब्जी (प्लेयर अननोन्स ब्याटलग्राउन्ड) को लतमा थिए।

उनले खेलको प्रभावमा आफ्नी आमा‚ दाजु र दिदीबहिनीको हत्या गरेको स्वीकार गरिसकेका छन्। दिनमा लामो समयसम्म अनलाइन गेम खेल्दा उनलाई केही मनोवैज्ञानिक समस्या देखिएको छ।

नाहिद मुबारक सम्बन्धविच्छेद गरेकी महिला थिइन्। पढाइमा ध्यान नदिने र दिनभर ‘पब्जी’ खेलेको भन्दै उनले छोरालाई गाली गर्ने गरेकी थिइन्।

विज्ञप्तिमा भनिएको छ– घटना भएको दिन नाहिदले छोरालाई गाली गरेकी थिइन्। त्यसपछि बालकले दराजबाट आमाको पेस्तोल निकालेर आमा‚ दाजु र दिदीबहिनीलाई गोली हानी हत्या गरेका थिए।

प्रहरीले बालकको रगत लतपतिएको लुगा बरामद गरिएको बताए।