फ्लाई दुबईका पाइलटले आफ्नो जहाज सुरक्षित रहेको त्रिभुवन विमानस्थलको एयर ट्राफिक कन्ट्रोलरलाई जानकारी दिँदै उडानलाई निरन्तरता दिएका छन् । लखनउ र दिल्ली पनि अवतरण नगरी गन्तव्यतर्फ अघि बढाइरहेकाे फ्लाइट राडरले देखाएकाे छ ।

त्रिभुवन विमानस्थलबाट दुबईका लागि उडेको कलसाइन एफजेड ५७६ भएको जहाज उडेको केहीबेरमै समस्याग्रस्त बनेको थियो । उड्नासाथ जहाजको एउटा इन्जिनमा समस्या आए पनि पाइलटले त्रिभुवन विमानस्थलमा आकश्मिक अवतरण गराएनन् । विमानले धादिङको धार्केमाथिको आकाशमा केहीबेर फन्को लगाउँदै आगो नियन्त्रण लिएको थियो ।

जहाज दिल्लीबाट पार भइसकेको छ । जहाजकाे एउटा इन्जिनमा लागेकाे आगाे निभ्नु नै खतरामुक्त हुनु हाे ।  उक्त इन्जिन बन्द भए पनि अर्काे इन्जिनकाे सहायताले जहाज उडाउन सकिन्छ । पाइलटले अहिले सिंगल इन्जिनमा जहाज उडाइरहेका छन् । विज्ञहरूका अनुसार कुनै पनि जहाज उडेर उचाईमा पुगिसकेपछि तत्काल अवतरण सहज हुँदैन ।

एउटा इन्जिनमा समस्या आएर असामान्य आगोकाे झिल्का र विस्फोटको आवाज सुनिएपनि केहीबेर आकाशमै होल्ड भएर जहाज गन्तव्यतर्फ लागेको हाे। असामान्य अवस्थाको जहाजले आकासमा केहीबेर फन्को लगाएको थियो ।

यससँगै जहाज गन्तव्यतर्फ लागेको त्रिभुवन विमानस्थलका प्रवक्ता टेकनाथ सिटौलाले जानकारी दिए । उनका अनुसार सम्भावित दुर्घटनालाई ध्यान दिँदै विमानस्थलमा सुरक्षाका आवश्यक सबै तयारी अपनाइएको थियो । तर जहाज नफर्किकन सुरक्षित रहेको जनाउसहित दुबईतर्फनै लागेको हो ।

प्राविधिक समस्या देखिएको सो जहाजमा १६९ जना यात्रु रहेका छन् । जसमा १२० विदेशी र ४९ जना नेपाली रहेका छन् ।

नागरिक उड्डयन प्राधिकरणका महानिर्देशक प्रदीप अधिकारीका अनुसार, आगो नियन्त्रणपछि चालक दलले इन्जिनमा कुनै समस्या नपरेको भन्दै उडानलाई निरन्तरता दिने निर्णय गरेको बताएका छन् ।

यसैबीच, संस्कृति पर्यटन तथा नागरिक उड्ययनमन्त्री सुदन किरातीले फ्लाई दुबई जहाज सुरक्षित आफ्नो गन्तव्यतिर गइरहेको बताएका छन् । उनले अब चिन्ता लिनपर्ने अवस्था नरहेको बताएका छन् । ‘फ्लाई दुवई जहाज सुरक्षित आफ्नो गन्तव्यतिर जाँदैछ । कोही चिन्ता नगर्नुहोला । सबैलाई शुभयात्रा’, उनले सामाजिक सञ्जालमार्फत भनेका छन् ।