पोखरा । पोखरामा मोटरसाइकल दुर्घटना हुँदा एक युवकको मृत्यु भएको छ। एक जना घाइते भएका छन्।

गएराति मोटरसाइकल अनियन्त्रित भइ दुर्घटना हुँदा काठमाडौँ कपनका १८ वर्षीय सफल खतिवडाको मृत्यु भएको हो । उनको उपचारका क्रममा मृत्यु भएको प्रहरीले जनाएको छ ।

मोटरसाइकल चालक तनहुँ म्याग्दे गाउँपालिका–४ थर्पुका १७ वर्षीय सङ्गम बानियाँ घाइते भएका छन् । बानियाँको टाउको र घाँटीमा चोट लागेको छ । उनको पोखराको मेट्रोसिटी अस्पतालमा उपचार भइरहेको छ ।

राति १:१० बजेको समयमा पोखरा महानगरपालिका–६ खहरेचोकस्थित हल्लनचोकबाट गैह्राकोचौतारातर्फ जाँदै गरेको ग२४प ३१० नं.को मोटरसाइकल आफैँ अनियन्त्रित भई सडकको छेउमा रहेको बिजुलीको पोलमा ठोक्किएको थियो ।

वडा प्रहरी कार्यालय बैदामबाट गएको प्रहरी टोलीले घाइतेलाई उद्धार गरी उपचारका लागि मेट्रोसिटी अस्पताल पठाएको थियो । घटनाबारे अनुसन्धान भइरहेको प्रहरीले जनाएको छ ।