काठमाडौं महानगरपालिका प्रमुख बालेन्द्र शाहले केही दिनयता आन्दोलनमा रहेका अभियन्तासँग आफूले वार्ता गर्न खोज्दा राजनीतिक स्वार्थका कारण नआएको बताएका छन् ।

मेयर शाहले सामाजिक संजालमा स्टाटस लेख्दै आन्दोलनरत युवालाई वार्ताका लागि बोलाउँदा नआएको भन्दै आफूहरुले अभियन्ताको कुरा र समस्या सुन्न तयार भए पनि उनीहरु वार्ताका लागि नआएको बताएका हुन् ।

मेयर शाहले अगाडि लेखेका छन् – ‘लोकतान्त्रिक अभ्यासमा सबै कुराको समाधान संवादबाट नै हुनुपर्छ भन्ने हामीले बुझेका छौं,’ ‘सायद कुनै राजनीतिक स्वार्थ जोडिएर आउन नखोज्नुभएको होला भन्ने हामीले बुझेका छौं । के वार्ता हामीले उहाँहरुका नेतासँग गर्नुपर्ने हो ?’ मेयर शाहले प्रतिप्रश्न गरेका छन्।

महानगरपालिकाले फुटपाथ खाली गराउनका लागि फुटपाथ व्यापारी हटाएर गरिखाने वर्गमाथि विभेद गरेको भन्दै केही युवा आन्दोलनमा छन् । प्रदर्शनीमार्गस्थित राष्ट्रिय सभागृहको भवन अगाडि ईः लगायतका केही युवा अभियन्ताले उभिएर विरोध प्रदर्शन गरिरहेका छन् ।