पोखरा । पोखरा महानगरपालिका वडा नम्बर १७ का जनप्रतिनिधिले आफूहरू निर्वाचित भएर जिम्मेवारी सम्हालेको दुई वर्ष पुगेको अवसरमा संस्था र व्यक्तिलाई सहयोग हस्तान्तरण गरेका छन् ।

वडाध्यक्ष राधिका शाही योगी नेतृत्वको टिमले पदस्थापन दिवस (जेठ १२)को अवसरमा शुक्रबार पोखरा वृद्धाश्रम, मानव सेवा आश्रम र मस्तिष्क पक्षघात पीडितलाई आवश्यक दैनिक उपभोग्य वस्तु हस्तान्तरण गरेको हो ।

जनप्रतिनिधिले शुद्ध पानी पिउने प्रयोजनका लागि यूरो गार्ड पोखरा वृद्धाश्रमका पदाधिकारीलाई हस्तान्तरण गरे । हस्तान्तरणपछि बोल्दै वडाध्यक्ष योगीले आफूहरूले वृद्धाश्रममा सहयोग गर्दै आएको र यसमा अझ ध्यान दिने बताइन् । उक्त आश्रममा ५४ जना वृद्धवृद्धा छन् ।

त्यस्तै, मस्तिष्क पक्षघातबाट पीडित वडाभित्रका ६ जनालाई डसना, सिरानी, तन्ना, डाइपर हस्तान्तरण गरिएको छ । सहयोग लिएर जनप्रतिनिधिहरू पीडितको घरघरमा पुगेका थिए । वडाभित्रै शाखा रहेको मानव सेवा आश्रममा जनप्रतिनिधिले सरसफाइ सामग्री हस्तान्तरण गरे ।

२०७९ साल वैशाखमा भएको स्थानीय तहको निर्वाचनमार्फत पोखरा–१७ को वडाध्यक्षमा एमाले उम्मेदवार शाही निर्वाचित भएकी थिइन् । सदस्यमा पनि एमालेकै विष्णुकुमारी थापा, तारा परियार, विक्रम गुरूङ र शिवराम भण्डारी निर्वाचित भएका थिए । शुक्रबार सहयोग हस्तान्तरण गर्न जनप्रतिनिधिसहित वडा सचिव प्रमिला सुवेदी, लेखापाल युवराज पौडेललगायत वृद्धाश्रम, मानव सेवा आश्रम र मस्तिष्क पक्षघात पीडितको घरमा पुगेका थिए ।