क्यानाडामा रहेको नेपाली राष्ट्रिय क्रिकेट टोलीले बुधबार बिहान भएको अभ्यास खेलमा क्यानडा हाइपर्फर्मेन्स टिम (एचपी) विरुद्ध जित हासिल गरेको छ ।

अमेरिकामा हुने आसन्न आइसिसी विश्वकप लिग २ सिरिजको तयारीका लागि क्यानडामा रहेको नेपाली राष्ट्रिय क्रिकेट टोलीले चौथो अभ्यास खेलमा एचपीलाई दुई विकेटले हराएको हो ।

एक सय ९५ रनको लक्ष्य पाएको नेपालले ४६.२ ओभरमा आठ विकेट गुमाउँदै एचपी विरुद्ध आफ्नो जित निकालेको हो । नेपालका लागि ओपनर अनिल शाहले ७३ बलमा ५९ रन, आरिफ शेखले ३४ र कुशल मल्लले ३० रन बनाएका थिए ।

यसअघि टस जितेर पहिले ब्याटिङ रोजेको एचपीले ४७.४ ओभरमा सबै विकेटको गुमाउँदै एक सय ९४ रन बनाएको थियो । एचपीका लागि ओपनर मिहार पटेलले ७२ र खाएविर खानले २८ रन बनाएका थिए ।

बलिङमा नेपालका कुशल भुर्तेलले तीन विकेट लिए भने करण केसी र सागर ढकालले दुई दुई तथा कुशल मल्ल र दीपेन्द्रसिंह ऐरीले एक एक विकेट लिएका थिए । नेपाल क्यानडाबाटै लिग-२ सिरिज खेल्न अमेरिका जानेछ ।

अमेरिकामा नेपालले टी-२० र आइसिसी विश्वकप लिग-२ सिरिज खेल्नेछ । जसअन्तर्गत नेपालले टी-२० शृङ्खलामा १७, १९ र २० अक्टोबरमा अमेरिकाको सामना गर्नेछ । त्यसपछि नेपालले लिग-२ मा अमेरिका र स्कटल्याण्डसँग खेल्ने तालिका रहेको छ । उक्त सिरिजमा नेपालले २७ अक्टोबर र २ नोभेम्बरमा अमेरिका तथा २९ अक्टोबर र ४ नोभेम्बरमा स्कटल्याण्डसँग खेल्ने छ ।