काठमाडौं । काठमाडौंको पिंगलास्थानस्थित होटेलमा मृत फेला परेकी सुस्मिता खड्कासँगै बसेर फरार भएका युवक झुन्डिएको अवस्थामा मृत फेला परेका छन् ।

ओखलढुंगा पूरानो घर भएका २३ वर्षीय देवबहादुर थापा झुन्डिएको अवस्थामा मृत फेला परेका हुन् । युवतीको मृत्युको कारण अझै खुलेको छैन ।

शनिबार दिउँसो उनी ओखलढुंगाकै सुनकोसी गाउँपालिका–३, सिस्नेरीमा झुन्डिएको अवस्थामा फेला परेको ओखलढुंगाका डीएसपी कृष्ण खड्काले जानकारी दिए ।

उनका बाबुआमा ओखलढुंगाबाट त्यहाँ आएपछि घर बनाएर नयाँ बस्तीमा बस्छन् । सुस्मिता र देवबहादुरको परिवारबीच पारिवारिक घनिष्ठता नै थियो । मृतक सुस्मिताको घर पनि त्यहीँ हो । होटलमा पुस १६ मा सुस्मिता मृत फेला परेकी थिइन् ।

देवबहादुरसँगै पिंगलास्थानस्थित वाग्मती होटेलको ३०८ नम्बर कोठामा बसेका थिए । करिब ३ घण्टापछि सुस्मिता सँगै गएका युवक ढोकामा ताला लगाएर फरार भएको अनुसन्धानमा संलग्न अधिकृतहरू बताउँछन् । एक जना अधिकृत भन्छन्, ‘बाहिरबाट ढोका लक्ड गरेर चाबी लिएर भागेको देखिन्छ ।’

लामो समयसम्म कोठा नखुलेपछि होटलमा रहेको मास्टर किबाट कोठा खोलियो । त्यसबेलासम्म युवतीको मृत्यु भइसकेको थियो । कोठाभित्र रेडबुलका केही बट्टामात्रै भेटिएको छ ।

होटलको कोठा देव बहादुरको नाममा बुक भएको भेटिएको छ । युवकका परिवार आलापोटमा बस्छन् । थापाले आफ्नो सवारी चालक अनुमति पत्रको फोटोकपी होटलमा बुझाएको बताइन्छ ।

बाहिरबाट ढोका लगाएर भागेको, युवतीको मोबाइल पनि साथमै लगेका कारण हत्या थापाबाटै भएको प्रहरीको दाबी छ ।

सुस्मिताको शरीरमा घाउचोट देखिएको छैन । जापान जाने तयारी स्वरूप उनले भाषाकक्षा पढिरहेकी थिइन् । युवक जापानबाट मंसिर ३० मा नेपालमा आएको अनुसन्धानमा संलग्न अधिकृतहरू बताउँछन् । ३ वर्षदेखि जापानमा बसेका ती युवक छुट्टीमा काठमाडौँ आएका थिए ।

२१ वर्षीया सुस्मिताको निधनले खड्का परिवारलाई असह्य भार परेको छ । एक्ली आमा क्यामुकी साहारा थिइन् उनी ।

१४ वर्ष पहिले बुबा कमलको निधन हुँदा उनी जम्मा ७ वर्षकी थिइन् । उनीभन्दा माथिका दुवै दिदी विवाह गरेर भक्तपुरस्थित पतिको घर गए । कागेश्वरी मनोहरा– १, आलापोट, सुवेदी गाउँको घरमा आमा क्यामु र उनीभन्दा सानो भाइमात्रै भए ।

जिल्ला काठमाडौं भए पनि आलापोट, सुवेदी गाउँ भनेको अहिलेसम्म ग्रामीण परिवेशकै ठाउँ हो । सानासाना कुराका राम्राभन्दा नराम्रा हल्लाले बजार पाउने । दुई दिदीको विवाहपछि सुस्मिता नै थिइन्, आमा र भाइको दुःख टार्ने । हाम्रा समाज नै यस्तो छ कि, छोरीले गरिखाएको पनि राम्रो नजरले हेर्दैन । यी सबै उल्झन झेल्दै झेल्दै उनी जापान जाने तयारीमा लागिन् ।

देव र सुस्मिताबीच प्रेम सम्बन्ध छ भन्ने अनुमान पनि कसैले गरेका थिएनन् । देव तीन वर्षपहिले जापान गएका हुन् । गाउँमा अहिले पनि उनका बुबा, आमा र दाजु बस्छन् ।