राष्ट्रिय स्वतन्त्र पार्टी(रास्वपा)का सभापति रवि लामिछाने अब छुट्छन् कि छुट्दैनन् ? धेरैको चासो छ । यतिबेला रवि विरूद्ध ठगीका साथसाथै, सङ्गठित अपराध र सम्पत्ति शुद्धीकरणमा पनि मुद्दा चलेको अवस्था छ ।

कास्की जिल्ला अदालतमा थुनछेक बहस कान्छा न्यायाधीश नीतिज राईको इजलासमा छ । केहीबेरमा राईको इजलासबाट आदेश आउँदैछ ।

 रवि सहितका अभियुक्तलाई सामान्य तारेखमा छाड्ने, धरौटीमा छाड्ने वा पुर्पक्षका लागि कारागार पठाउने भन्ने विषयमा एक आदेश आउने छ । अदालतले यतिबेला आदेशको तयारी गरिरहेको छ ।

लामिछानेलाई अदालतले साधारण तारेख वा धरौटीमा छाड्ने आदेश भए पनि उनी बिहीबारै हिरासतमुक्त हुने सम्भावना भने छैन । किनभने रवि विरुद्ध अन्य चार ठाउँमा सहकारी ठगीकै मुद्दामा पक्राउ पुर्जी जारी भएको छ ।

रुपन्देहीको सुप्रिम, चितवनको सहारा, काठमाडौंको स्वर्णलक्ष्मी र विरगञ्जको सानोपाइला सहकारी ठगी प्रकरणको अनुसन्धानमा पनि सम्बन्धित जिल्लाका जिल्ला अदालतले रवि विरुद्ध प्रहरीलाई पक्राउ पुर्जी दिएका छन् ।

काठमाडौंको स्वर्णलक्ष्मी ठगी प्रकरणको मुद्दा अदालत पुगिसकेको छ । जहाँ अब रविलाई थुनछेककै लागि अदालतमा पेस गर्नुपर्ने छ । कास्कीबाटै उता पठाउनुपर्ने हुन्छ । अन्य ठाउँमा प्रहरी अनुसन्धान नै गरिरहेको छ । यसर्थ रवि बिहीबार कास्की अदालतको आदेशले छुटे भनेपनि तत्काल पक्राउ परिहाल्नेछन् ।