पोखरा । सहकारीको रकम अपचलन मुद्दामा धरौटीमा रिहा भएका राष्ट्रिय स्वतन्त्र पार्टी (रास्वपा) का सभापति रवि लामिछाने आइतबार मात्र जिल्ला अदालत काठमाडौंमा हाजिर हुने भएका छन् ।

रास्वपाका सहकोषाध्यक्ष दीपक बोहोराका अनुसार शुक्रबार कास्कीमा आवश्यक कानुनी कार्य सकेर काठमाडौं जान केही ढिलाइ भएको हो ।

उनले भनेका छन्, रवि दाईका अनुसार उहाँ कास्कीमा आवश्यक कानुनी कार्यहरू सकेर काठमाडौंतर्फ जाने क्रममा हुनुहुन्छ।सम्बन्धित निकायहरूसँगको सम्पर्क र समन्वयमा आइतबार बिहानै ८:३० मा नै काठमाडौं जिल्ला अदालतमा हाजिर हुनुहुनेछ।

लामिछाने शुक्रबार अपरान्ह साढे १२ बजे स्थलमार्ग हुँदै पोखराबाट काठमाण्डौका लागि प्रस्थान गरेका हुन् ।

स्वर्णलक्ष्मी सहकारीको रकम गोरखा मिडियामा लगेर अपचलन गरेको आरोपमा काठमाडौंमा पनि उनीविरुद्ध मुद्दा दायर भइसकेको छ ।

सूर्यदर्शन सहकारी ठगी, संगठित अपराध र सम्पत्ति शुद्धीकरणसम्बन्धी कसुरमा जिल्ला अदालत कास्कीका न्यायाधीश नीतिज राईको इजलासले उनलाई हिजो बिहीबार ६५ लाख धरौटीमा रिहा गर्न आदेश दिएको थियो ।

गत २ कात्तिकमा काठमाडौंबाट पक्राउ परेका लामिछानेलाई कास्की प्रहरीको हिरासतमा राखिएको थियो । कास्कीको सूर्यदर्शन सहकारी लगायतमा परेको मुद्दाको अनुसन्धानका लागि प्रहरीले पक्राउ गरेको थियो ।