पोखरा । अमेरिकाको लस एन्जलसमा भएको आगलागीमा परी मृत्यु हुनेको संख्या २४ पुगेको छ। क्यालिफोर्नियाका मौसमविद्हरूले थप तीव्र हावा चल्ने चेतावनी दिएका छन्, जसले गर्दा यो साता आगलागी अझै बढ्न सक्ने अनुमान गरिएको छ।

लस एन्जलस काउन्टीका स्वास्थ्य अधिकारीहरूले मृत्यु हुनेको संख्या २४ पुगेको पुष्टि गरेका छन्। आगलागीका कारण इटन क्षेत्रमा ११ जनाको र पालिसेड्स क्षेत्रमा ५ जनाको मृत्यु भएको छ।

सबैभन्दा बढी क्षति पालिसेड्स क्षेत्रमा भएको छ जहाँ २३ हजार एकडभन्दा बढी क्षेत्र जलेको छ।

आइतबार मूल्याङ्कनकर्ताहरूले यसको प्रारम्भिक क्षतिको अनुमानलाई बढाउँदै २५० देखि २७५ अर्ब अमेरिकी डलरबीच हुने बताएका छन् ।

लस एन्जलस क्षेत्रमा अहिले चारवटा आगो नियन्त्रणमा लिन प्रयास भइरहेको छ। अधिकारीहरूका अनुसार दक्षिण क्यालिफोर्निया क्षेत्रमा यतिखेर १४ हजार अग्नि नियन्त्रकहरू सक्रिय छन्, जसलाई ८४ वटा विमान र १ हजार ३५४ वटा दमकलले सघाइरहेका छन् ।

अनिवार्यरूपमा घर छाड्नुपर्ने आदेशका कारण अन्यत्र सारिएका मानिसको सङ्ख्या १ लाख ५ हजार पुगेको छ । अझै ८७ हजार मानिसलाई घर छाड्नुपर्ने हुन सक्ने भनिएको छ ।