प्रेस चौतारी नेपालका केन्द्रीय अध्यक्ष गणेश बस्नेतले नेकपा एमालेको नीति, सिद्धान्तमा रहने सदस्यहरू ईमानदार, श्रेष्ठ रहने र उनीहरु नै अघि बढ्ने बताएका छन् ।

प्रेस चौतारी मोरङ जिल्ला शाखाको अधिवेशन उद्घाटन समारोहमा बोल्दै केन्द्रीय अध्यक्ष बस्नेतले माक्र्सवाद, लेनिनवाद र जनताको बहुदलीय जनवादलाई शिरमा राखेर अघि बढेका कार्यकर्ताहरूले यसको मर्म बुुझ्नुपर्ने पनि बताए ।

‘जबजले प्रतिष्पर्धामा श्रेष्ठता भन्छ, त्यो कामले श्रेष्ठता हो । काम गर्नेहरू अघि बढ्छन् । केपी ओली सबैलाई माया गर्ने, सम्मान गर्ने, काम गर्नेलाई अघि बढाउने नेता हुनुहुन्छ । कारबाही गर्ने बाध्यता हो ।’ अध्यक्ष बस्नेतले भने ।

कामको मूल्यांकन हुने भन्दै उनले थपे – ‘मेरो स्वभाव यस्तै छ, अन्याय नगर्ने, काम गर्नेहरुलाई पछाडि पार्ने षड्यन्त्र विफल पार्ने, गुटबन्दीमा लाग्नेहरुलाई ठाउँ नदिने । इमानमा न एमाले चुकेको छ, न चौतारी चुनेको छ । न चौतारीका अध्यक्ष चुकेका छन्, न चौतारीका साथीहरु चुकेका छन् ।’

पार्टी विरुद्ध देशको हित नचाहने अराजक तत्वहरुको घेराबन्दी गरेका बेला देशैभर सर्वसम्मत नेतृत्व आवश्यकता भएको उनको आशय छ । उनले भने – ‘म अनलाइनको सम्पादक पनि हूँ, समाचारकै कारण साइबर क्राइममा मुद्धा छ, अदालतमा तारिख धाउनुपरेको छ ।’

पदमा बसेका साथीहरुले पदीय मर्यादा ख्याल गरेर बोल्न, साथीहरू नउचाल्न आग्रह गर्दै उनले भने– ‘नेता हुनेहरुले समस्या समाधान गर्ने हो, समस्या खडा गर्ने होइन । पदमा बसेका साथीहरू मिलाउन लाग्नुहोला ।

प्रेस चौतारीको महाधिवेशन मोरङले यसअघि गरिसकेकाले चुनौती र अनुभव सबै थाहा भएकाले कामको समीक्षासँगै फागुन २५ देखि बिराटनगरमा हुन लागेको प्रेस चौतारी नेपालको दशौं महाधिवेशनलाई पोखरा भन्दा पनि भव्य र सभ्य रुपमा सम्पन्न गर्ने गरी तयारी गर्न निर्देशन दिए ।

उनले भने – ‘पोखरामा भएको नवौं महाधिवेशनलाई कसरी जित्ने भनेर प्रतिष्पर्धा गर्नुपर्नेछ । सबै उपसमितिहरुले तदारुकताका साथ काम गर्नुहोस् ।’

सरकारको कामले निजी क्षेत्र उत्साहित भएको छ, अर्थतन्त्र चलायमान भएको छ: मुख्यमन्त्री कार्की

कोशी प्रदेश सरकारका मुख्यमन्त्री हिक्मतकुमार कार्कीले नेपाली कांग्रेस र एमाले मिलेर बनेको सरकारले उत्साहजनक रूपमा काम गरेको बताए ।

प्रेस चौतारी मोरङको अधिवेशनको उद्घाटन गर्दै मुख्यमन्त्री कार्कीले नेपाली कांग्रेस र नेकपा एमाले बिचको सहमतिबाट बनेको यो सरकारबाट उत्साह छाएको बताए । सरकारका कामको सकारात्मक नतिजा आउन थालेको पनि उनले बताए । ‘सरकारको पछिल्ला कामहरूले निजी क्षेत्र उत्साहित भएको छ, अर्थतन्त्र चलायमान भएको छ’, उनले भने ।

कोशी प्रदेशमा पनि राजस्व वृद्धिदर बढेको बताउँदै उनले राजश्वमा प्रदेश सरकारले राखेको लक्ष्य पूरा हुने बताए । कोशी प्रदेश सरकारले यही अधिवेशनबाट आमसञ्चार व्यवस्थापन गर्न बनेको विधेयक पास गरेर पत्रकारिता क्षेत्रको विकासका लागि काम गर्ने पनि कार्कीले जानकारी दिए ।

पछिल्लो समयमा सञ्चार माध्यममा नकारात्मक कुराले प्राथमिकता पाएको बताउँदै उनले यस्ता समाचारलाई निरुत्साहित गर्नुपर्ने बताए । यथार्थ समाचारलाई सम्प्रेषण गर्नुपर्ने उनको धारणा छ ।

प्रेस चौतारी मोरङको अध्यक्षमा चिना थापा निर्वाचित

प्रेस चौतारी नेपाल मोरङको नवौँ जिल्ला अधिवेशनले चिना थापाको अध्यक्षतामा सर्वसम्मत नेतृत्व चयन गरेको छ ।

जसको खुल्ला उपाध्यक्षमा अशोक पौडेल निर्वाचित भए भने समावेशी उपाध्यक्षमा रञ्जना अधिकारी चुनिएका छन् । सचिवमा नवराज भट्टराई निर्वाचित हुँदा खुल्ला सहसचिवमा कृष्णचन्द्र सुवेदी र समावेशी सहसचिवमा राजकुमारी तामाङ, कोषाध्यक्षमा भने पुण्यप्रसाद अधिकारी चुनिएका छन् ।

सदस्यहरूमा विसान्त ढुंगाना, विशाल भण्डारी, प्रमोद कार्की, सामना भट्टराई, संगीता राई, सिसिर राई, शिवकिशोर परिहसब, रोहन राई, दीपक खड्का, रामकुमार शर्मा, रोम दाहाल, कूलदीप बास्तोला, विवेक खतिवडा र सुमता भट्टराई निर्वाचित भएका छन् ।