काठमाडौं । प्रेस चौतारी नेपालका उपाध्यक्ष गणेश पाण्डेले प्रधानमन्त्री केपी शर्मा ओली विरूद्ध अहिले अनेक खालका घेराबन्दी गरिएको बताएका छन् ।

सोमबार प्रेस चौतारी नेपाल बर्दियाको जिल्ला अधिवेशन उद्घाटन कार्यक्रममा बोल्दै पाण्डेले प्रधानमन्त्री र सरकार विरुद्ध अनेक खालका भ्रम फिँजाउने काम भएको उल्लेख गरे । ‘प्रधानमन्त्री केपी शर्मा ओली माथि निकै ठूलो घेराबन्दी भइरहेको छ, निकै ठूलो भ्रम फैलाउने काम भइरहेको छ, निकै धेरै मिथकहरू फैलाइएका छन्’, उनले भने ।

सरकारले गरेका सकारात्मक कामको पनि चर्चा हुनुपर्नेमा उनले जोड दिए । अहिलेको सरकारले अर्थतन्त्रलाई लयमा फर्काउने र रोकिएका विकास निर्माणलाई अघि बढाउने काम गरिरहेको भन्दै पाण्डेले यस्ता विषय समाचारका विषय बन्नु पर्ने बताए । ‘त्यो देखेर केही मानिसहरू अत्तालिएका छन् र प्रधानमन्त्रीका विरुद्ध भ्रमको खेती गरिएको छ’, पाण्डेले भने ।

अहिले केही शक्तिहरूबाट नेपालको विकासको गति रोक्ने र आत्मनिर्भर नेपाल बनाउने अभियानलाई रोक्ने प्रयत्न भइरहेको पाण्डेले बताए । यसतर्फ सञ्चार जगत् सचेत हुनुपर्नेमा उनले जोड दिए । ‘यस्ता प्रवृत्तिका विरुद्ध जुध्न र कलम चलाउनको लागि पत्रकारहरूलाई अनुरोध गर्दछु’, उनले भने ।