काठमाडौं । सरकारले पूर्वराजा ज्ञानेन्द्र शाहको सेवा सुविधा खोस्ने र राहदानी रद्द गर्ने तयारी थालेको छ।

दुर्गा प्रसाईँको नेतृत्वमा शुक्रबार भएको हिंसात्मक प्रदर्शन उनैको नेतृत्वमा भएको र उनी विदेश भाग्ने अंशका भएपछि उनीको राहदानी रद्द गर्ने तयारी भएको हो ।

गृहको उच्च स्रोतले भन्यो– ‘पूर्वराजा ज्ञानेन्द्रकै निर्देशनमा आन्दोलन भएको छ। छानबिनपछि विदेश भाग्ने आशंकाले राहदानी रद्द गर्ने प्रक्रिया अघि बढेको छ ।’

हिंसात्मक घटनामा संलग्नलाई कारबाही गर्न, ज्ञानेन्द्रलाई देशबाहिर जान रोक लगाउन र उनले पाउँदै आएको सुविधा खोस्न मन्त्रीहरूले प्रस्ताव गरेका छन् । शुक्रबार रातिको मन्त्रिपरिषद् बैठकमा हिंसात्मक र आपराधिक गतिविधिबारे गम्भीर छलफल भएको थियो।

“ज्ञानेन्द्र शाहको गतिविधिका विषयमा विभिन्न कोणबाट गम्भीर छलफल भयो,” एक मन्त्रीले भने,“तर निर्णय केही भएको छैन । कानुनविपरीतको काम गर्नेलाई कारबाही गर्नका लागि कुनै निर्णय गरिरहन परेन तर ज्ञानेन्द्र शाहको भूमिकाका सन्दर्भमा छलफल चाहिँ भएको छ ।”

उनका अनुसार पूर्वराजाको सेवा सुविधा खोस्नेदेखि विदेश भ्रमणमा रोक लगाउने सम्बन्धमा छलफल भएको थियो । “गृह मन्त्रालयलाई अध्ययन गरेर सिफारिस गर्न अधिकार दिएको छ,” उनले भने, “सबै अधिकार गृहलाई दिएको छ । अब के के गर्ने भन्ने सिफारिस गृहले गर्ला ।”

सबैजसो मन्त्रीले गम्भीर विषयमा समीक्षा गर्नुपर्ने र सरकारले एउटा ‘एक्सन’ लिनुपर्ने धारणा राखेका थिए ।

पूर्वराजाका समर्थकद्वारा तीनकुने क्षेत्रमा शान्तिपूर्ण प्रदर्शनको लागि पूर्वअनुमति लिई भएको प्रदर्शनका क्रममा निषेधित क्षेत्रसमेत तोडी निजी सम्पत्ति, अस्पताल, सञ्चारगृह, राजनीतिक दलका कार्यालय, व्यापारिक क्षेत्रलगायत यातायातका सवारी साधनमाथि तोडफोड गरेका थिए ।

उक्त घटनामा दुई जनाको मृत्यु भएको थियो । सो घटनामा जम्मा एक सय १० जना घाइते भएका छन् । नेपाल प्रहरीका ५३ जना, सशस्त्र प्रहरी बलका २२ र प्रदर्शनकारीतर्फ ३५ जना घाइते भएका थिए ।

यसैगरी नौ वटा सरकारी सवारी साधन, छ वटा सरकारी वा निजी नखुलेका सवारी साधनमा आगजनी भएको छ । विभिन्न १४ स्थानमा आगजनी भएको, नौ वटा संस्थामा तोडफोड र एक स्थानमा लुटपाट भएको प्रहरीले जनाएको छ ।

प्रदर्शनका क्रममा तोडफोड र आगजनीमा संलग्न १०५ जना पक्राउ परेका छन् ।