पोखरा । बेलायतको लण्डन वाटरलु नजिकै थेम्स नदी किनारमा नेपाली विद्यार्थी मृत फेला परेको छ ।

त्यहाँको प्रहरीले शव रुकुम पश्चिम मुसीकोट नगरपालिका–१२ का २० वर्षीय सुशान ओलीको भएको पुष्टि गरेको हो ।

लण्डन मेट्रोपोलिटन (महानगरीय) प्रहरीका अनुसार गत मंगलबार थेम्स नदी किनारमा ती विद्यार्थीको शव भेटेको थियो । तर, शवको पहिचान हुन सकेको थिएन।
नेपालबाट फिङ्गर प्रिन्ट (औंठा छाप रेकर्ड) झिकाए पछि प्रहरीले उक्त शव नेपाली विद्यार्थी सुशान ओलीको भएको पुष्टि गरेको लण्डनस्थित नेपाली राजदूतावासले जनाएको छ ।

बेलायतको कोभेन्ट्री विश्वविद्यालयमा बिजनेश म्यानेजमेन्ट एन्ड लिडरसीप कोर्समा ब्याचलर्स दोस्रो वर्ष पढ्ने तयारी गरिरहेका ओली अप्रिल २१ तारिख (बैशाख ८) देखि सम्र्पकविहीन थिए ।

दूतावासमा भने यसको जानकारी २३ तारिखमा पुगेको थियो । प्रहरीले अनुसन्धानको क्रममा लण्डनको वाटरलूनजिकै थेम्स नदीमाथिको पुल छेउ ओली शव र उनको मोबाइल, पर्स, कोठाको चाबी, पासपोर्टलगायत फेला पारेको थियो । त्यसपछि प्रहरी अनुसन्धानको क्रममा उनी बस्ने डेगेनहृयाम हीथवे नजिक घर पुगेको थियो । त्यसपछि प्रहरीले कोभेन्ट्री विश्वविद्यालय पढ्ने नेपाली विधार्थीसँग सम्पर्क गरेर थप अनुसन्धान अघि बढाएको थियो ।