पोखरा । पोखरामा जारी एक्सपर्ट एजुकेसन अन्तर विद्यालय छात्र टि–२० क्रिकेट च्याम्पीयनसीपमा प्रतिभा मावि र रत्न ज्योति सेकेण्डरी स्कुल सेमीफाइनलमा प्रवेश गरेका छन् । पोखरा महानगरपालिका क्रिकेट संघको आयोजनामा पोखराको लेखनाथस्थित ईडेन गार्डेन क्रिकेट मैदानमा जारी प्रतियोगितामा दुबै टिम समूह बिजेता बन्दै सेमीफाइनलमा प्रवेश गरेका हुन् ।

समूह सी अन्तर्गत बुधबार भएको प्रतियोगितामा प्रतिभा माविले जुनियर सिटिजन एकेडेमीलाई ९ विकेटले पराजित गर्दै समूह बिजेता बनेर सेमीफाइनल यात्रा सुनिश्चित गरेको थियो । लगातार तीन खेल जितेको प्रतिभा सहजै सेमीफाइनलमा प्रवेश गरेको आयोजक पोखरा महानगरपालिका क्रिकेट संघका अध्यक्ष बिरेन्द्र पुनले जानकारी दिए ।

१९ ओभरमा घटाइएको बुधबारको खेलमा प्रतिभाले टस जितेर बलिङ रोजेको थियो । पहिलो व्याटिङमा उत्रिएको जुनियर सिटिजन एकेडेकीले निर्धारित १९ ओभरमा ६ विकेटको क्षेतीमा १४३ रनको योगफल तयार गरेको थियो । उसका लागि सौरभ शर्माले ४३ रन तथा दीपेन सुवेदीले ३८ रनको योगदान दिए । जुनियर सिटिजनलाई कम स्कोरमा रोक्न प्रतिभाका दिक्षान्त अर्यालले ४ ओभरमा १७ रन खर्चेर २ विकेट लिएका थिए ।

१४४ रनको लक्ष्य लिएर जवाफी व्याटिङमा उत्रिएको प्रतिभाले ११.३ ओभरमा १ विकेटको क्षेतीमा सहजै लक्ष्य भेट्टायो । प्रतिभाका सफल श्रेष्ठले ९१ रन तथा साबुद्दिन अन्सारीले १९ रनको योगदान दिए ।

९१ रनको योगदान दिएका प्रतिभा माविका सफल श्रेष्ठ बुधबारको खेलमा प्लेयर अफ दी म्याच घोषित भए । समूह बी अन्तर्गत बुधबार भएको अर्को खेलमा एसओएस हर्मनमाईनर सेकेण्डरी स्कुलले डायमण्ड एकेडेमीलाई ३ रनको झिनो अन्तरले पराजित गर्‍यो । डायमण्डले टस जितेर बलिङ रोजेपछि एसओएसले १९.१ ओभरमासबै विकेट गुमाएर १३३ रनको योगफल तयार गर्‍यो । डायमण्डका लागि सचेत सुवेदीले २४ रन तथा आनन्द आचार्यले २२ रनको योगदान दिए । एसओएसलाई ठूलो स्कोर बनाउनबाट रोक्ने क्रममा डायमण्डका सुमन विकले ३ विकेट तथा असीम पौडेलले २ विकेट हत्याए ।

१३४ रनको लक्ष्य लिएर जवाफी ब्याटिङमा उत्रिएको डायमण्ड निर्धारित २० ओभरमा ८ विकेटको नोक्सानीमा १३० रनमा सिमित भएपछि समूह चरणबाटै बाहिरिनु पर्‍यो । डायमण्डका अविरल क्षेत्रीले २६ रन तथा जेनिस आलेले २३ रनको योगदान दिए । डामण्डलाई सस्तैमा समेट्ने क्रममा एसओएसका बिराज सापकोटाले २ विकेट हत्याए । उनी बुधबारको खेलमा प्लेयर अफ दी म्याच घोषित भए ।

समूह बी मा रहेका रत्न ज्योति, एसओएस र डायमण्डले समान एक/एक खेल जितेपछि रनरेटको आधारमा रत्न ज्योति सेमीफाइनलमा पुगेको पोखरा महानगरपालिका क्रिकेट संघका अध्यक्ष बिरेन्द्र पुनले जानकारी दिए । रत्न ज्योतिको प्लस ०.८५५ रनरेट रहेको तथा डायमण्ड र एसओएसको माईनस रनरेट भएकाले रत्न ज्योति सेमीफाइनलमा पुगेको उनले बताए ।

बुधबारको खेलमा प्रायोजक एक्सपर्ट एजुकेसन एण्ड भिसा सर्भिसेसका ब्राञ्च म्यानेजर सलिम दिवान र बिजनेस डेभलपमेन्ट म्यानेजर विष्णुप्रसाद गौतम प्रतियोगिता स्थलमा गएर खेलाडीलाई हौसला प्रदान गरेका थिए । उनीहरुले मैदानमा आवश्यक पूर्वाधार निर्माणमा सघाउनेपनि प्रतिबद्धता जनाए ।

प्रतियोगिता अन्तर्गत विहीबार न्यूलाइट सेकेण्डरीबिरुद्ध सिर्जना मावि तथा वाराही माविबिरुद्ध त्रिवेणी पव्लिक स्कुल प्रतिष्पर्धामा उत्रिने आयोजक पोखरा महानगरपालिका क्रिकेट संघका अध्यक्ष बिरेन्द्र पुनले जानकारी दिए ।