नेकपा (एमाले) निकट अनेरास्ववियुको जारी महाधिवेशनमा नेतृत्व चयनका लागि बुधबार मतदान हुँदैछ।

सर्वसम्मतको प्रयास विफल भएपछि निर्वाचन हुने भएको हो । हिजो राति अबेर सम्म उम्मेदवारी दर्ता भएको थियो । ३२ वर्षे उमेरहद लागेपछि अध्यक्षमा दुई जना प्रतिस्पर्धी देखिएका छन्।

अध्यक्षमा प्रकाश पौडेल र डा. सुजन कडरियाले उम्मेदवारी दर्ता गरेका छन् । अध्यक्षमा दाबी गरेका दीपक धामी कडरियालाई सहयोग गर्दै उनको महासचिव बन्न तयार भएका छन् । एक्ला एक्लै चुनाव लड्दा प्रकाश पौडेल भारी बन्ने देखेपछि कडरिया र धामी एकै समूहमा रहेर अध्यक्ष र महासचिव उम्मेदवार बन्दै पौडेल विरुद्ध प्रतिष्पर्धामा उत्रन लागेका हुन् ।

उपाध्यक्षमा ८ जनाको उम्मेदवारी परेको छ । खुल्ला उपाध्यक्षमा भरत धामी लिपुलेक, राजकुमार ढकाल, विकास श्रेष्ठ, धमेन्द्र केसी र रोहित बमको उम्मेदवारी परेको छ । त्यस्तै, महिला उपाध्यक्षमा अञ्जना सिवाकोटी, आरती भट्टराई, सुनिता धिताल र भवानी बजगाईँको उम्मेदवारी छ ।

महासचिवमा दीपक धामीसँगै आरके रोमस, र सुनिल कँडेलको उम्मेदवारी परेको छ । उपमहासचिव पदमा कमल जोशी, अमर शाही, र प्रेमिका शाहीको उम्मेदवारी परेको छ भने सचिवमा तीन दर्जन बढी उम्मेदवार छन् ।

रक्षा बम, मनोज राई, अनुप लामिछाने, रेखा न्यौपाने, नीरज पौडेल, धर्मराज तिमिल्सेना, स्मृति बराल, मदन भण्डारी राजेश ओली लगायत करिब ३५ जनाको सचिव पदमा उम्मेदवारी परेको छ ।

एमालेको संशोधित नीतिअनुसार अनेरास्ववियुको पदाधिकारी ९ सदस्यीय हुनेछ। १५१ सदस्यीय केन्द्रीय कमिटी हुनेछ।

पदाधिकारीमै ५० जना हाराहारीको उम्मेदवारी परेको छ। केन्द्रीय कमिटीको उम्मेदवारको संख्या नै ६ सय भन्दा बढीको रहेको छ।

पार्टी हाइ कमान्डले अनेरास्ववियुको नेतृत्व सर्वसम्मत चयन गर्न निर्देशन दिएको थियो । चुनावको माग गर्दै होहल्ला र नाराबाजी गरेपछि निर्वाचन कार्य तालिका सार्वजनिक गरिएको हो ।

अनेरास्ववियुमा दुई खेमा देखिएको छ । एउटा खेमाको नेतृत्व पौडेलले गरेका छन्। अर्को खेमाको नेतृत्व डा. कडरियाले गर्दै प्रतिनिधिहरूको बीचमा मत मागिरहेका छन्।

कार्य तालिका अनुसार उम्मेदवारको दर्ता फारम ३ देखि ५ बजेसम्म वितरण गर्ने, ४ देखि ६ बजेसम्म दर्ता गर्ने उल्लेख थियो ।

मतदान बिहान १० बजेदेखि ५ बजेसम्म हुने उल्लेख छ । अन्तिम नामावली भने आउन बाँकी छ । मतदानको समय केही ढिलो हुन सक्ने बताइएको छ ।