भक्तपुरको ठिमीमा मृत भेटिएका दिदीबहिनी दुई साताअघि भारतको मुम्बईबाट नेपाल आएर बसेको तथ्य खुलेको छ ।

परिवारलाई थाहा नदिई उनीहरू के कति कारणले नेपाल आए भन्ने कुरा प्रहरी अनुसन्धानबाट अझै खुल्न सकेको छैन । प्रहरी परिसर भक्तपुर र प्रहरी वृत्त ठिमीले अहिले उक्त घटनाको अनुसन्धान गरिरहेको छ ।

मुम्बईस्थित मीर भाइन्दरमा बस्ने १६ वर्षीया मेनुका कँडेल र १३ वर्षीया सिर्जना कँडेल बिहीबार बिहान मध्यपुर ठिमी नगरपालिका– ८ बोडे सिन्टीटारस्थित चक्रधर प्रजापतिको जस्ताको टहरोमा झुण्डिएको अवस्थामा मृत फेला परेका थिए ।

भक्तपुर परिसरका प्रवक्ता एवं प्रहरी नायब उपरीक्षक ढुण्डीराज नेउपानेका अनुसार मेनुका र सिर्जनाको मृत्युको रहस्य खुलेको छैन । उनले लोकान्तरसँग भने, ‘बुवाआमा मुम्बईबाट दिल्ली हुँदै जहाजमा काठमाडौं आउँदै हुनुहुन्छ, त्यसपछि मात्रै यी दिदीबहिनी किन काठमाडौं आए, परिवारमा के खटपट भयो लगायतका कुरा खुल्छन् ।’

अभिभावकले बताएअनुसार मेनुका र सिर्जनालाई एक होटलमा काममा लगाइएको थियो, जहाँ सीसीटीभी थिएन । ‘भारतकै एक टेलिभिजनलाई मेनुका र सिर्जनाका बुवाआमाले बताएअनुसार उनीहरूलाई एक होटलमा, त्यो पनि सीसीटीभी नभएको ठाउँमा काममा लगाइएको रहेछ,’ डीएसपी नेउपानले भने, ‘अब अभिभावक आएपछि नै बुझ्छौं ।’

सुर्खेत पञ्चपुरी नगरपालिका– ८ स्थायी घर भएका बासुदेव कँडेल र उमा कँडेल मुम्बईमा सपरिवार बस्दै आएका थिए । छोरीहरूको मृत्युको खबरपछि उनीहरू नेपाल आउँदै गरेको बताइएको छ ।