काठमाडौंस्थित त्रिभुवन अन्तर्राष्ट्रिय विमानस्थलको रन वेको लाइट बिग्रिँदा साढे ३ घण्टादेखि कुनै पनि उडान अवतरण हुन सकेको छैन ।

विमानस्थलको धावनमार्गमा बिजुली सर्ट हुँदा समस्या देखिएको विमानस्थलले जनाएको छ । स्रोतका अनुसार विमानस्थलको Edge Light मा समस्या आएको हो । यो लाइट रनवेका दुवै छेउमा राखिएका हुन्छन्, जसले कम दृश्यता (Low Visibility) का समयमा पनि विमानलाई रनवेको सीमाना देखाउन र सुरक्षित रूपमा अवतरण गर्न मार्गदर्शन गर्छ।

बेलुका ५ बजेर २५ मिनेट जाँदादेखि सबै विमानको उडान र अवतरण रोकिएको छ । यसले गर्दा हजारौँको यात्रा अस्तव्यस्त भएको छ ।

केही विमानहरु आकाशमै होल्ड गरिएको छ । समस्या समाधानको प्रयास भए पनि हुन सकेको छैन ।

धेरै जहाज आकाशमै होल्ड गरिएको छ भने एउटा जहाज दिल्ली डाइभर्ट गरिएको छ । कोरियाबाट काठमाडौं आएको कोरिएन एयरको जहाज दिल्ली डाइभर्ट गरिएको जनाइएको छ । साथै आन्तरिक उडान पनि ल्याण्ड गराउन नसकेर फर्काइएको छ ।

अहिले विमानस्थलको धावनमार्गमा रहेका पोलको एक एक निरीक्षण गरी समाधानको प्रयास भएको छ । प्राविधिक मर्मत कार्यमा जुटिरहेको बताइएको छ ।