उच्च माध्यमिक विद्यालय सङ्घ नेपाल (हिसान) कास्कीद्वारा आयोजित तत्स्थान कविता लेखन तथा वाचन प्रतियोगितामा प्रतिभा माविकी छात्रा करिना काफ्ले प्रथम भएकी छन् ।

प्रतियोगितामा त्रिवेणी सेकेण्डरी स्कूलकी दियन्का गुरूङ द्वितीय र सगरमाथा स्कूलका कृतज्ञ अधिकारी तृतीय भए । हिल प्वोइन्ट सेकेण्डरी स्कूलका आशिष लामिछानेले सान्त्वना स्थान प्राप्त गरे ।

प्रतियोगितामा सहभागीहरूलाई ‘स्वप्न सम्मेलन र खरानीमा देश’ शीर्षक दिएर कविता लेख्न लगाइएको थियो ।

कार्यक्रमका प्रमुख अतिथि अग्रज कवि तीर्थ श्रेष्ठले कविता र यसका आयामबारे परिचर्चा गरेका थिए । सानैदेखि विद्यार्थीलाई साहित्यमा अभिरुची जगाउनका लागि यस्ता कार्यक्रम निकै फलदायी हुने बताउँदै कवि श्रेष्ठले नयाँ पुस्ताको प्रतिभाको खुलेर प्रशंसा गरे ।

प्रतियोगिताको निर्णायकहरूमा कवि इश्वरमणि अधिकारी र लक्ष्मण थापा रहेका थिए ।

हिसान कास्कीका अध्यक्ष दिवाकर जैसीको अध्यक्षतामा भएको कार्यक्रममा वरिष्ठ उपाध्यक्ष डा. ढाकाराम कँडेलले स्वागत तथा प्रतियोगिता संयोजनसमेत गरेका पुनर कुँवरले सुञ्चालन गरेका थिए ।

प्रतिभा माविले सर्वोत्कृष्ट हुन सफल विद्यार्थी करिनालाई बधाई ज्ञापन गरेको छ ।

Screenshot