नेकपा (एमाले) का अध्यक्ष केपी शर्मा ओलीले देशमा अब कुनै पनि प्रकारको हिंसात्मक र विध्वंसात्मक गतिविधि हुन नदिने बताएका छन्।

उनले नेकपा (एमाले) जनताको सुरक्षाका लागि उभिने भन्दै अब कसैले पनि असुरक्षित महसुस गर्नुनपर्नेमा जोड दिए।

आइतबार राष्ट्रिय युवा संघ, नेपालको केन्द्रीय कमिटीको तेस्रो पूर्ण बैठकलाई सम्बोधन गर्दै अध्यक्ष ओलीले भने, ‘अब कोही पनि देशमा नडराउनुस्, नेकपा एमाले छ।’

उनले देशमा अब उप्रान्त कसैका घर वा उद्योग जलाउन र पसल लुट्न नदिइने बताए। ‘देशमा अब उप्रान्त कसैका घर जलाउन दिइने छैन, कसैका उद्योग जलाउन दिइने छैन, कसैका पसलहरू, डिपार्टमेन्टल स्टोरहरू लुट्न दिइने छैन,’ उनले भने, ‘नेकपा एमालेले अब त्यसको प्रबन्ध गर्नेछ।’

जेन-जी आन्दोलनबारे अध्यक्ष ओलीले केही आपराधिक तत्वले युवाहरूको नाममा प्रतिगामी र आतंककारी क्रियाकलाप गरेको आरोप लगाए।

‘जेन-जी त १२ बजे नै आन्दोलन टुंग्याएर फर्किसके,’ उनले भने, ‘केहीलाई छेकेर लगियो त्यहाँ गोली चलाउने ठाउँमा। अरुले उपद्रव गरे, गोली जेन-जीलाई लाग्यो।’

उनले यस्ता गतिविधिले देशको अर्थतन्त्रलाई २५ वर्ष पछाडि धकेलेको सुनाए। ‘देशमा यत्रो १६ सय संरचनाहरू जलाएर २५ वर्ष देशको अर्थतन्त्र पछाडि पर्‍यो,’ उनले भने, ‘सिंहदरबार जलाएर के उपलब्धि हुन्छ ? धान फल्छ ? कुनै कम्प्युटरको विकास हुन्छ ?’

अध्यक्ष ओलीले उद्योग र कलकारखाना बन्द हुँदा मजदुरहरू बेरोजगार भएको र उनीहरूका छोराछोरी विद्यालय छाड्न बाध्य भएको उल्लेख गरे।

उनले जनताको सुरक्षाको प्रत्याभूति नभएको अवस्थामा नागरिक आफैँ आफ्नो सुरक्षाका लागि अग्रसर हुनुपर्ने स्थिति आएको बताए। एमालेले देशमा कसैलाई पनि असुरक्षित हुन नदिने र त्यसको व्यवस्थापन गर्ने उनले प्रतिबद्धता जनाए।