काठमाडौं । नेकपा एमालेसम्वद्ध विद्यार्थी संगठन अनेरास्ववियुको पदाधिकारी बैठकले डा. सुजन कडरियाको राजीनामा स्वीकृत गर्ने निर्णय गरेको छ ।

नेपाल कमर्श क्याम्पसमा बसेको बैठकले महासचिव दीपक धामीलाई अध्यक्ष बनाउने निर्णय गरेको हो ।

जेन-जी आन्दोलनमा विद्यार्थी मारिएको विषयमा असन्तुष्टि जनाउँदै कडरियाले राजीनामा घोषणा गरेका थिए । उपाध्यक्ष अञ्जना शिवाकोटीलाई महासचिव बनाउने र अरु पदाधिकारी यथावत् राख्ने निर्णय गरेको धामीले नेपाल प्रेसलाई बताए ।

सुजनले सार्वजनिक रूपमा दिएको राजीनामालाई आधार मानेर पारित गरिएको पार्टीका जनसंगठन समन्वय प्रमुख भानुभक्त ढकालले बताए ।

नेतृत्वमा आलोपालो गर्ने सहमति भएको छ । धामी र शिवाकोटीबीच नेतृत्व भागबन्डा गर्ने सहमति भएको छ । धामीले ०८३ जेठ ३ गते शिवाकोटीलाई अध्यक्ष हस्तान्तरण गर्ने सहमति बनेको बताइन्छ ।

धामी जेठमा ३२ वर्षे उमेर हद नाघ्ने भएकाले शिवाकोटीलाई नेतृत्व हस्तान्तरण गर्ने सहमति बनेको हो । नेतृत्व हस्तान्तरण जेठमा राष्ट्रिय भेला वा महाधिवेशनमै गएर गरिने समझदारी बनेको छ । यसले संगठनभित्र पनि विवाद नहुने र पार्टीको निर्देशन कार्यान्वयन पनि हुने ती पदाधिकारीले बताए ।