काठमाडौं । आगामी फागुन २१ गते हुने प्रतिनिधि सभा सदस्य निर्वाचनको सरगर्मी बढेको छ । मतदानको मिति आउन अब ९० दिन मात्र बाँकी छ । समय नजिकिँदै गर्दा निर्वाचन आयोग र राजनीतिक दलहरूले तयारी तीव्र पारेका छन् ।

आयोगले निर्वाचन कार्यक्रम अन्तर्गत शनिबारदेखि नै समानुपातिक तर्फको प्रक्रिया थाल्ने भएको छ । आयोगका प्रवक्ता नारायणप्रसाद भट्टराईका अनुसार शनिबार (मंसिर २१ गते) दलहरूले समानुपातिक प्रणालीका लागि निवेदन दिनुपर्नेछ । यसका लागि बिहान १० बजेदेखि अपराह्न ४ बजेसम्मको समय तोकिएको छ । आवेदन दिएका दलहरूको सूची मंसिर २४ गते प्रकाशित हुनेछ ।

दलहरूले आगामी पुस १३ र १४ गते समानुपातिक उम्मेदवारको बन्दसूची पेस गर्नुपर्नेछ । बन्दसूची बुझाउन बिहान १० देखि ४ बजेसम्मको समय निर्धारण गरिएको छ । समानुपातिकतर्फका उम्मेदवारको अन्तिम बन्दसूची भने माघ ३० गते प्रकाशित हुनेछ ।

प्रत्यक्षतर्फको निर्वाचन कार्यतालिका पनि सार्वजनिक भएको छ । जसअनुसार आगामी माघ ६ गते उम्मेदवारको मनोनयनपत्र दर्ता हुनेछ । सोही दिन उम्मेदवारको सूची प्रकाशन गरिनेछ । माघ ७ गते उम्मेदवारीमाथि विरोधमा उजुरी दिने समय तोकिएको छ ।

आयोगले माघ ८ गते उम्मेदवारको नामावली प्रकाशन गर्नेछ । माघ ९ गते उम्मेदवारले नाम फिर्ता लिन सक्नेछन् । सोही दिन उम्मेदवारको अन्तिम नामावली प्रकाशन गरी निर्वाचन चिह्न प्रदान गरिने कार्यक्रम छ ।