केपी शर्मा ओली नेकपा (एमाले) को एघारौं महाधिवेशनबाट तेस्रो कार्यकालका लागि अध्यक्षमा निर्वाचित भएका छन् ।

अध्यक्षका अर्का प्रत्यासी बरिष्ठ उपाध्यक्ष ईश्वर पोखरेललाई भारी मतान्तरले पराजित गर्दै ओली तेस्रो पटक पार्टीको बागडोर सम्हाल्न पुगेका छन्।

सार्वजनिक अन्तिम मतपरिणाम अनुसार एमालेको नयाँ नेतृत्वमा केपी शर्मा ओली पक्षको एकछत्र वर्चश्व देखिएको छ। दुई छुट्टाछुट्टै प्यानल बनाएर चुनावी मैदानमा उत्रिएकोमा अधिकांश पदमा ओली प्यानलका उम्मेदवारले बाजी मारेका छन्।

ईश्वर पोखरेलको प्यानलबाट पदाधिकारीमा जम्मा दुई जना नेताले मात्र जित हासिल गर्न सके।

पोखरेल प्यानलबाट उपाध्यक्षमा गोकर्ण विष्ट र उपमहासचिवमा योगेश भट्टराई मात्र विजयी भएका छन्। सचिव लगायत अन्य महत्त्वपूर्ण पदहरूमा ओली प्यानलका उम्मेदवारहरू नै निर्वाचित भएको निर्वाचन आयोगले जनाएको छ।

यस्तै, तत्कालीन नेकपा माओवादीसँग एकता भई पछि फुट आउँदा एमालेमै बसेका नेताहरुले दुवै प्यानलबाट मत पाएको देखिन्छ । उपाध्यक्ष रामबहादुर थापा बादल र उपमहासचिव लेखराज भट्टले राम्रो मत पाए ।