नेकपा (एमाले)का नेता एवं निवर्तमान सांसद बासुदेव घिमिरेले पार्टी परित्याग गरेको चर्चाले बुधबारसम्म राजनीतिक चर्चा पायो । आम नागरिकको अपेक्षालाई सम्बोधन गर्नु अहिलेको आवश्यकता भएको बताउँदै मंगलबार राति घिमिरेले पार्टी परित्यागको घोषणाका गरेका थिए ।

‘पुराना राजनीतिक दलहरूको मुख्य नेतृत्वले मुलुकको आम जनताको इच्छा र चाहनालाई सम्बोधन गर्ने अवस्था नदेखिएकोले आजको दिनदेखि म संलग्न रहेको पार्टीको जिम्मेवारीदेखि अलग रहेको छु’, घिमिरेले सामामाजिक सञ्जालमा लेखेका थिए ।

अघिल्लो प्रतिनिधिसभा सदस्यको निर्वाचनमा रुपन्देही– ५ बाट निर्वाचित भएका घिमिरेले एमाले छोडेपछि उनी राष्ट्रिय स्वतन्त्र पार्टी (रास्वपा)मा प्रवेश गर्न थालेको चर्चा पनि भयो । उनले रुपन्देही– २ बाट चुनाव लड्ने तयारी गरेको बताइएको थियो ।

रुपन्देही– २ बाट एमाले उपाध्यक्ष विष्णु पाैडेल निर्वाचित भएका थिए । यसपटक रास्वपा प्रवेश गरी रुपन्देही– २ मा विष्णु पाैडेललाई घिमिरेले धक्का दिन थालेको चर्चाका बीच बिहीबार साँझ उनै घिमिरेसँग तस्वीर खिचाउँदै पाैडेलले फेसबुकमा लेखेका छन्– हामी सँगै छाैँ ।

बिहीबार दिउँसोदेखि पाँच घन्टासम्म एमालेका युवा कमल पौडेलको घरमा उपाध्यक्ष पौडेलले गुनासो सुन्ने र एमालेमै फर्काउने गरी छलफलमा जुटे ।

सो छलफलमा के भयो भन्ने प्रश्नमा उपाध्यक्ष पौडेल बोल्नै खोजेनन् । उनले भने-  “हाम्रो छलफल भयो । मैले लेखेपनि सकेको छु । बाँकी बासुज्यूलाई नै सोध्नुहोला,” उनले भने ।

बासुदेवका असन्तुष्टिको बारेमा के भयो ? भन्ने प्रश्नमा पौडेलले धेरै कुरा बोल्न नमिल्ने, बैठक अझै बसिरहेको तर्क गरे ।

उपाध्यक्ष पौडेलसहित बासु घिमिरेसँगको बैठकमा बसेका नेता खिमलाल भट्टराईले तत्काल अन्त नजाने समझदारी भएको बताए ।

बैठकको सुरुआतीदेखि नै बासुदेवलाई बिचलित नभई एमालेमै रहन उपाध्यक्ष लगायतको आग्रहलाई सकारात्मक लिएको बताए । “तत्कालै कतै नजाने समझदारी भएको बुझेको छु, बसाइँ सकेर बासुजीसहितका नेताहरू उठ्नुभयो,” उनले भने ।

बासुदेव रास्वपामा बालेन समूहबाट प्रवेश गर्ने तयारीमा छन् । उनले एमालेमा कुनै पनि हालतमा नरहने घोषणा फेसबुक स्टाटसमा गरेका थिए ।

उनले अन्त कतै जाने वा नजानेमा केही समय स्थिर रहन सक्ने तर एमालेमा कुनै हालतमा नफर्किने ठोकुवा गरेका थिए ।