जेन-जी आन्दोलनको क्षतिबारे छानबिन गर्न बनेको उच्चस्तरीय जाँचबुझ आयोगले बयानका लागि लगाएको सबै उच्च पदस्थ व्यक्तिहरूको स्थान हद फुकुवा गरेको छ।

नेकपा एमालेका अध्यक्ष तथा पूर्वप्रधानमन्त्री केपी शर्मा ओलीको स्थान हद फुकुवा भएसँगै सबै उच्च पदस्थ व्यक्तिहरूको स्थान हद फुकुवा भएको हो।

भदौ २३ र २४ को घटनासम्बन्धी जाँचबुझ आयोगले ओलीमाथि लगाएको विदेश भ्रमण रोक र स्थान हद फुकुवा गर्ने निर्णय गरेको हो।

आयोगको सोमबार बसेको बैठकले ओलीको विदेश भ्रमणमा लगाइएको रोक र काठमाडौं उपत्यका छाड्न नपाउने पूर्ववर्ती निर्णय फुकुवा गरेको जनाएको छ।

आइतबार जाँचबुझ आयोगले अध्यक्ष ओलीसँग बयान लिएको थियो। त्यससँगै उनको स्थान हद फुकुवा गरिएको जाँचबुझ आयोगका प्रवक्ता विज्ञानराज शर्माले जानकारी दिए।

तत्कालीन गृहमन्त्री रमेश लेखक, तत्कालीन गृहसचिव गोकर्णमणि दुवाडी, तत्कालीन काठमाडौं जिल्लाका प्रमुख जिल्ला अधिकारी छविलाल रिजाल, नेपाल प्रहरीका तत्कालीन महानिरीक्षक चन्द्रकुवेर खापुङ, राष्ट्रिय अनुसन्धान आयोगका प्रमुख अनुसन्धान निर्देशक हुतराज थापालाई असोज १२ गते निर्णय गर्दै आयोगले स्थान हद लगाएको थियो।

उनीहरूलाई विदेश भ्रमणमा रोक लगाउन र आयोगको स्वीकृतिबेगर काठमाडौं उपत्यका छाड्न नपाउने व्यवस्था गर्न आयोगले सरकारलाई भनेको थियो।

पूर्वगृहसचिव दुवाडी, पूर्वआइजीपी खापुङ र पूर्वप्रमुख जिल्ला अधिकारी रिजालको स्थान हद फुकुवा गर्ने निर्णय आयोगले पुस ७ गते नै गरेको थियो।

अनुसन्धान प्रमुख थापाको भने त्यसअघि नै स्थान हद फुकुवा गरिएको थियो।