काठमाडौँ । नेकपा एमालेले प्रदेश संयोजक तोकेको छ । मंगलबार पार्टी कार्यालय च्यासलमा बसेको सचिवालय बैठकले कोशी प्रदेशमा शेरधन राई, मधेस प्रदेशमा लीलानाथ श्रेष्ठ, बागमती प्रदेशमा महेश बस्नेत र राजधानी प्रदेशमा राजन भट्टराईलाई संयोजक तोक्ने निर्णय भएको उपमहासचिव लेखराज भट्टले जानकारी दिए ।

यसैगरी, गण्डकी प्रदेशमा खगराज अधिकारी, कर्णाली प्रदेशमा यामलाल कँडेल, सुदूरपश्चिम प्रदेशमा गणेश ठगुन्नालाई संयोजक तोकिएको छ । यस्तै, भानुभक्त ढकाललाई संगठन विभागको संयोजक तोकिएको भट्टले जानकारी दिए ।

चुनाव हारेका विष्णु रिमाललाई दियो तीन ठाउँमा जिम्मेवारी

हालै सम्पन्न ११औँ महाधिवेशनमा उपमहासचिव पदमा पराजित भएका नेता विष्णु रिमाललाई पार्टीका तीनवटा महत्वपूर्ण जिम्मेवारी सुम्पेको छ।

बैठकले आगामी निर्वाचनलाई लक्षित गर्दै गठन गरेका समितिहरू र विभागमा रिमाललाई महत्वपूर्ण भूमिका दिएको हो।

महाधिवेशनमा पदाधिकारीमा पराजित भए पनि अध्यक्ष केपी शर्मा ओलीका विश्वासपात्र मानिने रिमाललाई निर्वाचनको तयारीका लागि पार्टीले ‘की’ रोलमा अघि सारेको छ।

जसअनुसार एमालेले उपाध्यक्ष रामबहादुर थापा ‘बादल’ को संयोजकत्वमा गठन गरेको ‘निर्वाचन परिचालन कमिटी’ को सचिवको जिम्मेवारी रिमाललाई दिएको छ।

यसैगरी पार्टी अध्यक्ष केपी शर्मा ओलीको संयोजकत्वमा गठन भएको ‘घोषणापत्र मस्यौदा समिति’ मा पनि रिमाललाई सदस्य तोकिएको छ।

यसका साथै, एमालेको नीति अनुसन्धान प्रतिष्ठानको अध्यक्षमा पनि रिमाललाई नै चयन गरिएको छ। बैठकले नियमावली संशोधन गर्दै अध्यक्ष ओलीको प्रस्तावमा रिमाललाई प्रतिष्ठानको अध्यक्ष बनाउने निर्णय गरेको हो।