काठमाडौँ- नेकपा एमालेले चुनावी तालमेल गर्न नेकपालाई प्रस्ताव गरेको छ।

एमाले अध्यक्ष केपी शर्मा ओलीले नेकपाका संयोजक पुष्पकमल दाहाल ‘प्रचण्ड’ र सह-संयोजक माधव नेपाललाई फोनमार्फत चुनावी तालमेलको प्रस्ताव गरेका हुन्। फागुन २१ गतेका लागि तोकिएको चुनावको मिति नजिकिएसँगै दलहरुले तयारी तीव्र पारेका छन्।

देशभर एमाले, नेकपा, कांग्रेस र रास्वपाबीच चौपक्षीय प्रतिस्पर्धासँगै केही क्षेत्रमा अरु दलहरूसमेत प्रतिस्पर्धामा रहेका अवस्थामा ओलीले चुनाव तालमेलका लागि हात अघि बढाएका हुन्।

नेकपाले भने ओलीको प्रस्तावलाई अस्वीकार गरेको बताइन्छ । नेता वर्षमान पुनले नेकपाले अहिले कुनै पनि दलसँग तालमेल नगर्ने बताए। पुनले भने, ‘अहिले हामी कोहीसँग पनि तालमेल गर्दैनौँ। त्यसको संभावना छैन। हामीले देशैभर उम्मेदवार उठाएका छौँ। आफ्ना उम्मेदवार जिताउन लाग्छौँ।’

एमालेका नेता राजेन्द्र गौतमले पार्टीले औपचारिक रुपमा कुनै पनि दलसँग संवाद नगरेको तर नेताहरूबीच भएका कुराकानीबारे आफूलाई जानकारी नभएको बताए। उनले भने, ‘औपचारिक रुपमा त कुनै दलसँग कुरा भएको छैन। तर नेताहरुबीच कुरा भएको हुन सक्छ। मलाई त्यसबारे जानकारी छैन।’

ओलीले फागुन २१ गतेको चुनाव निष्पक्ष हुन नसक्ने दाबी केही दिनअघि सार्वजनिक रुपमा गरेका थिए। उनीले चुनावमा सार्नसमेत अरु दलका नेताहरुसँग लविङ गरिरहेका छन्।