प्रधानमन्त्री सुशीला कार्कीले २१ फागुनमा चुनाव एकैपटक हुने प्रस्ट्याएकी छन् ।

मतपत्र छपाइको अवलोकनको लागि ठिमीस्थित जनक शिक्षा सामग्री केन्द्र पुगेर कार्कीले यस्तो बताएकी हुन् ।

अब मतपत्रमा जनताले छाप लगाउन मात्रै बाँकी भएको उनको भनाइ छ । ‘मतपत्र हेरेपछि हामीलाई लाग्यो अब निर्वाचन आयो । अब जनताले छाप लगाउन मात्रै बाँकी छ,’ कार्कीले भनिन्, ‘निश्चिन्त हुनुस् अब चुनाव आयो । चुनाव एकै दिन हुन्छ । दुईपटक गरेर चुनाव हुँदैन, एकैपटक हुन्छ ।’

यसअघि प्रधानमन्त्री कार्कीले मौसमले साथ नदिए उच्च हिमाली जिल्लामा दोस्रो चरणमा चुनाव गर्न सकिने बताएकी थिइन् । कार्कीको अभिव्यक्तिपछि चुनावलाई लिएर अनेक संशय उत्पन्न भएका थिए ।

यसै विषयमा एमाले अध्यक्ष केपी ओलीले पनि बिहीबार बालुवाटार पुगेर प्रधानमन्त्री कार्कीसँग छलफल गरेका थिए । समयमा चुनाव गराएर छिट्टै सत्ता हन्तान्तरण गर्ने कार्कीको भनाइ छ ।

प्रधानमन्त्री कार्कीले प्रतिनिधिसभा सदस्य निर्वाचन, २०८२ का लागि मतपत्र छपाइको प्रगतिबारे जानकारी लिएकी हुन् । जनक शिक्षा सामग्री केन्द्र लिमिटेडको छापाखानामा अवलोकन निरीक्षणका क्रममा प्रधानमन्त्रीसँगै गृहमन्त्री ओमप्रकाश अर्याल, कानुन, न्याय तथा संसदीय मामिलामन्त्री अनिलकुमार सिन्हा, प्रमुख निर्वाचन आयुक्त रामप्रसाद भण्डारीसहित निर्वाचन आयोगका पदाधिकारी पनि साथमा थिए ।