काठमाडौँ — भौतिक पूर्वाधार तथा यातायात मन्त्रालयले सार्वजनिक सवारी साधनको भाडा समायोजन गर्न यातायात व्यवस्था विभागलाई सैद्धान्तिक सहमति दिएको छ । सहमति पाएसँगै भाडा समायोजन गर्ने निर्णय भएको विभागले जनाएको छ । त्यहीअनुसार विभागले अन्तर प्रदेश भाडा समायोजनको सूचनासहितको सूची सार्वजनिक गरेको छ ।

इन्धनको मूल्यमा हुने घटबढअनुसार सार्वजनिक सवारीसाधनको भाडा स्वतः घटबढ हुने गरी स्वचालित भाडा प्रणाली ३१ चैत ०७८ को मन्त्रीस्तरीय निर्णयबाट लागू भएको थियो । त्यहीअनुसार यातायात व्यवस्था विभागले पेट्रोलियम पदार्थको मूल्य ५ प्रतिशत वा सोभन्दा बढीले घटेमा वा बढेमा सोही अनुपातमा अन्तरप्रदेशीय यातायातको भाडा समायोजन गर्ने अधिकार पाएको छ । त्यहीअनुसार सूचकहरूको विश्लेषण तथा इन्धनको मूल्यमा आएको परिवर्तनले गर्दा भाडा समायोजन गरिएको यातायात व्यवस्था विभागले जनाएको छ ।

सरकारको निर्णयअनुसार यात्रुवाहक सवारी साधनमा १६.७१ प्रतिशत भाडा समायोजन गरिएको छ । त्यस्तै पहाडी बाटोमा सञ्चालन हुने मालवाहक सवारीमा २१.६८ र तराईको बाटोमा सञ्चालन हुने मालवाहक सवारीमा १५.७५ प्रतिशत भाडा समायोजन गरिएको छ ।

काठमाडौँ-पोखराको भाडा दर ७६१ पुगेको छ। यसअघि काठमाडौँ-पोखरा ६५२ रहेको थियो। नर्मल सवारी सधानको भाडा दर हो। डिलक्स र सुपर डिलक्सको भाडा यो भन्दा बढी रहेको छ।

यस्तै काठमाडौँ-नेपाल नेपालगन्जका लागि १८२०, काठमाडौँ-धनगढी २३४७, काठमाडौँ-तुलसीपुर १५०२, काठमाडौँ-विराटनगर १८५२, काठमाडौँ-भद्रपुर २०८०, काठमाडौँ-महेन्द्रनगर २०६६ पुगेको छ।

यसैगरी काठमाडौँ-बैतडी ३१६८, काठमाडौँ-मोरङ १९६४ भडादर पुगेको छ। यो नर्मल सवारी सधानमा हो। नर्मलबाहेकको सवारी सधानमा यो भन्दा बढी भाडा तोकिएको छ।

मंगलबार सरकारले सार्वजनिक सवारीको भाडामा १६.७१ प्रतिशत, माल वहाक सवारी साधनको २१.६८ प्रतिशत (पहाडि रुट) र तराई रुटमा चल्ने माल वहाक सवारीको भाडा १५.७५ प्रतिशतले बढाएको थियो।