पोखरा ५ पर्स्याङमा रहेको शान्ति निकेतन स्कूलले आफ्‌नो उत्कृष्ट नतिजाको यात्रालाई निरन्तरता दिएको छ । एसइई २०८२ मा विद्यालयबाट सहभागी ३९ जना विद्यार्थीमध्ये ३ जनाले सर्वोत्कृष्ट ४ जीपीए प्राप्त गरेको विद्यालयले जनाएको छ ।

विद्यालयका प्रतिमा पौडेल, सखिम भण्डारी र संगम क्षेत्रीले ४ जीपीए ल्याएका छन् । यी बाहेक ५ जनाले ३.९ भन्दा बढी जीपीए ल्याएका छन् भने ३.६ जीपीए बढी ल्याउने १६ जना छन् ।

विद्यालयका संस्थापक प्रीन्सिपल डा. महेश्वर पराजुलीले वर्षेनी विद्यालयको नतिजामा सुधार हुँदै आएको बताउँदै सन्तुष्टि व्यक्त गरे । २०८० मा एक जनाले र २०८२ मा दुई जनाले ४ जीपीए ल्याएका थिए । विद्यार्थीको मेहनत, अनुभवी शिक्षक शिक्षिकाको लगनशीलता, अभिभावकको निरन्तर चासो र सहयोगले गर्दा विद्यालयले उचाई हाँसिल गर्न सफल भएको उनले दावी गरे ।

विद्यालयका सहायक प्राचार्य यदूविलास भूर्त्यालले विद्यालयको नतिजाले उत्साहित बनाएको प्रतिक्रिया दिए ।

यसैबीच, शान्ति निकेतनले सुविधासम्पन्न पूर्वाधार तयार गरी यसै वर्षदेखि कक्षा ११ को पढाई सुरु गरेको छ । साइन्स बायोलोजी, साइन्स कम्प्युटर, म्यानेजमेन्ट बिजनेश म्याथ, म्यानेजमेन्ट कम्प्युटर र म्यानेजमेन्ट बिजनेश स्टडिजमा अध्ययन सुरु गरेकाले उत्कृष्ट विद्यार्थीलाई भर्नाका लागि सूचना प्रकाशन गरेको छ ।