काठमाडौं : नेकपा (एमाले) ले सरकारले ल्याएको बजेट गैरजिम्मेवार रहेको निष्कर्ष निकालेको छ।

शनिबार सिंहदरबारमा बसेको एमाले संसदीय दलको बैठकले समग्रमा बजेट गैरजिम्मेवार र हावादारी रहेको निष्कर्ष निकालेको प्रमुख सचेतक ऐनबहादुर महरले जानकारी दिए। दुईतिहाइ बहुमतको सरकारले ल्याएको बजेट रूपान्तरणकारी हुन नसकेको टिप्पणी गरेको छ । सरकारले प्रस्तुत गरेको आगामी आर्थिक वर्षको बजेट अपरिपक्व रहेको निष्कर्ष निकालेको छ ।

बजेट निमुखा तथा तल्लो वर्गको हितमा नरहेको एमालेका प्रमुख सचेतक ऐन महरले जानकारी दिए ।

उनका अनुसार दुईतिहाइ बहुमत प्राप्त सरकारले ल्याएको बजेट अपेक्षित रूपमा रूपान्तरणकारी हुन नसकेको बैठकको निष्कर्ष छ । बजेटले तल्लो वर्गलाई समेट्न नसकेको तथा विकासका लागि आवश्यक स्रोतको पनि सुनिश्चितता नदेखिएको उनकाे भनाइ छ ।

‘दुईतिहाइ बहुमतको सरकारबाट रूपान्तरणकारी बजेट आउन सकेन । यसले तल्लो वर्गलाई समेट्न सकेन । बजेटका निम्ति स्रोतको पनि सुनिश्चितता भएन,’ प्रमुख सचेतक महरले भने ।

एमालेले संविधान संशोधनको भावनाविपरीत प्रावधान अघि बढाउने प्रयास भएको भन्दै त्यसको प्रतिरोध गर्ने चेतावनी दिएको छ । संसदीय दलका नेताहरूका अनुसार मस्यौदा समितिमा भएको छलफल विपरीतका प्रावधानहरू अघि बढाउन खोजिएको आरोप लगाइएको छ ।