भारतका लागि नेपालका पूर्वराजदूत दीपकुमार उपाध्यायले आइतबार प्रधानमन्त्री बालेन्द्र शाहले सदनमा भनेजस्तो नेपालले पनि भारतको जग्गा मिचेको आफूले अहिलेसम्म नसुनेको बताएका छन् ।

उपाध्यायले भने, ‘हामीले गरेको अध्ययनमा अहिलेसम्म नेपालले भारतको जग्गा मिचेको कतै भेटाएका छैनौ, सुनेका पनि छैनौ, भारतले पनि त्यो कुरा कतै भनेको रेकर्डमा भेटिएको छैन, प्रधानमन्त्रीले सदनमै यो विषय किन र कसरी भन्नुभयो भन्ने विषय त उहाँबाटै जवाफ आउला तर यस्तो गम्भीर विषय सदनमा भन्दा तथ्य पनि भनिनुपर्दछ, सबैलाई प्रष्ट पारिनुपर्दछ ।’ उपाध्यायले सीमा क्षेत्रका धेरै नागरिकको दुवै देशमा जग्गा भएको, दुवै देशको उत्तिकै प्राथमिकतामा राख्ने भेटिएको र खेती गर्दा दशगजा यता र उता भएको हुनसक्ने भए पनि तथ्यांकमै नेपालबाट सीमा नै मिचिएको विषय अहिलेसम्म आफूले नसुनेको जनाए । ‘नेपाल तर्फबाट भारतको कहीँ कतै जग्गा मिचिएकोजस्तो मलाई लाग्दैन, प्रधानमन्त्रीले भनेजस्तो होइन, यो विषय प्रधानमन्त्री र उहाँको पार्टीबाट आउला’ उनले भने ।

• थप समाचारका लागि नेपाल प्रेस ।