डडेल्धुराबाट शुक्रबारदेखि बेपत्ता रहेका सशस्त्र प्रहरी जवानसहित दुई जना मृत अवस्थामा भेटिएका छन् ।

बेपत्ता सशस्त्र प्रहरीको बीओपी परिगाउँमा कार्यरत जवान ओमप्रकाश पुन मगरको शव कञ्चनपुरको ब्रह्मदेव क्षेत्रमा भारततर्फको महाकाली नदी किनारमा र उनका मामा तीर्थबहादुर थापामगरको शव परशुराम नगरपालिका–५ स्थित महाकाली नदीको कल्पठ्ठेमा भेटिएको जिल्ला प्रहरी कार्यालय डडेल्धुराका प्रमुख डिएसपी डीएसपी वरुणबहादुर सिंहले जानकारी दिए।

डीएसपी सिंहले दिएको जानकारी अनुसार डडेल्धुरातर्फ फेला परेका थापामगरको शव परीक्षणका लागि जोगबुढा अस्पतालमा राखिएको छ भने भारतीय भूमीमा मृत भेटिएका कारण सशस्त्र प्रहरी जवान पुनमगरको शव भारतीय प्रहरीले घटनास्थल मुचुल्का उठाउने कार्य सकेर उतैतिर लगेको जिल्ला प्रहरी कार्यालय कञ्चनपुरका प्रहरी निरीक्षक बिनोद थापाले जानकारी दिए ।

अब भारतीय प्रहरीले कानुनी प्रक्रिया पूरा गरेर परिवारलाई शव जिम्मा लगाउनेछन्। घटनाबारे आवश्यक अनुसन्धान थालिएको प्रहरीले जनाएको छ ।