लगातारको वर्षा, बाढी र पहिरोका कारण काठमाडौं उपत्यकासहित देशका विभिन्न मुख्य राजमार्गहरू अवरुद्ध भएका छन् ।

साँझ ७:०० बजेसम्मको आधिकारिक तथ्याङ्क अनुसार कान्तिलोकपथ, कालीगण्डकी करिडोर र कर्णाली राजमार्ग लगायतका दर्जनभन्दा बढी महत्त्वपूर्ण सडक खण्डहरू पूर्ण रूपमा अवरुद्ध भएका छन् ।

निरन्तरको वर्षासँगै नारायणघाट-मुग्लिङ सडक खण्ड अन्तर्गत तुइन खोला नजिकै पहिरो खसेपछि दुईतर्फी यातायात पूर्ण रूपमा अवरुद्ध भएको छ ।

काठमाडौं उपत्यका जोड्ने छोटो दुरीको कान्तिलोकपथ सडक खण्ड ललितपुरको बागमती गाउँपालिका–३ भट्टेडाँडा स्थित पाण्डुर, टाकुर्चे र भालु खोलामा पहिरो खसेका कारण पूर्ण रूपमा बन्द भएको छ ।

बागमती प्रदेशकै फाखेल–कुलेखानी सडक खण्ड र हेटौंडा–काठमाडौं जोड्ने सिसनेरी खण्ड पनि पहिरोका कारण बन्द छन् ।

सम्भावित बाढीपहिरोको जोखिमलाई मध्यनजर गर्दै काभ्रेस्थित बीपी राजमार्ग र कान्तिलोकपथको हेटौंडा–ललितपुर खण्डमा सवारी साधन सञ्चालनमा रोक लगाइएको छ। अरनिको राजमार्गको सिन्धुपाल्चोक भोटेकोशी खण्ड भने एकतर्फी सुचारु रहेको छ ।

कोशी प्रदेश अन्तर्गत पाँचथरको याङवरक गाउँपालिका स्थित मध्यपहाडी लोकमार्ग र इलामको मेची राजमार्ग पूर्ण रूपमा बन्द छन् भने भोजपुर खण्ड एकतर्फी रूपमा सञ्चालनमा छ ।

गण्डकी प्रदेशको कास्कीस्थित पोखरा–ताङतिङ भित्री सडक खण्ड ठप्प छ भने नयाँपुल–घान्द्रुक सडक खण्ड एकतर्फी सुचारु रहेको छ ।

लुम्बिनी प्रदेशको गुल्मीस्थित कालीगण्डकी करिडोर र मदन भण्डारी राजमार्ग तथा अर्घाखाँचीको सालझन्डी–ढोरपाटन सडक खण्ड पहिरोका कारण पूर्ण रूपमा अवरुद्ध छन् ।

यस्तै, कर्णाली प्रदेशको हुम्लास्थित कर्णाली करिडोर र कालिकोटको कर्णाली राजमार्ग पनि पहिरोका कारण पूर्ण रूपमा ठप्प भएका छन् ।