काठमाडौं । श्रम संस्कृति पार्टीका सांसद आरेन राईले सीमाकाे विषयमा आफूहरूले महिनौँदेखि उठाउँदा पनि प्रधानमन्त्रीले जवाफ नदिएको भन्दै आपत्ति जनाएका छन्। प्रतिनिधि सभाको बैठकमा बोल्दै प्रधानमन्त्रीको अभिव्यक्तिप्रति आफूलाई डर लागेको टिप्पणी गरे ।

हामीले अब दुई महिना हाराहारी हुन लाग्यो, एक महिना क्रस भो। प्रधानमन्त्रीज्यूले दिनुभएको अभिव्यक्ति करेक्सन गर्नुपर्छ, यो रोष्टममा बोल्नुभएको रेकर्डबाट हटाउनुपर्छ भनेको बरु ढुङ्गा बोल्छ, मान्छे बोल्दै बोल्दैन। त्यसै कारणले गर्दा मलाई कता कता डर लागेको छ।

प्रधानमन्त्रीज्यूले काठमाडौं महानगरपालिकाको मेयर हुँदै गर्दा एउटा फेसबुकमा स्ट्याटस लेख्नुभयो, कतै एउटा केही सडकमा समस्या भयो, सिंहदरबार जलाइदिन्छु भन्नुभयो। आज उहाँले सिंहदरबार जलाइदिन्छु जसरी भनेर उहाँले फेसबुकमा अभिव्यक्ति दिनुभयो, केही समय पछाडि हाम्रो त्यसको सार्वभौम संसद् भवन लगायत, सर्वोच्च अदालत, सिंहदरबार, जल्यो।