काठमाडौं । प्रधानमन्त्री वालेन्द्र शाह (बालेन)ले आफू हिन्दु राष्ट्र र राजसंस्थाको पक्षमा नरहेको स्पष्ट पारेका छन् । मधेसबाट प्रतिनिधित्व गर्ने दलका नेताहरूसँग शुक्रबार छलफलमा प्रधानमन्त्री शाहले संघीयताको पक्षमा आफूमाथि शंसय नराख्न पनि आग्रह गरेको राष्ट्रिय मुक्ति पार्टी नेपालका अध्यक्ष राजेन्द्र महतोले बताए ।

प्रधानमन्त्रीले संघीयताप्रति सरकार पूर्णतः प्रतिवद्ध रहेको र यसलाई कमजोर पार्ने कुनै पनि सोच नभएको र हिन्दू राष्ट्र र राजसंस्थाको पक्षमा नरहेको स्पष्ट पारेको महतोले जानकारी दिए ।

‘उहाँले हिन्दु राष्ट्र र राजावादीको पक्षमा आफू नरहेको भन्दै हामीलाई विश्वास दिलाउन खोज्नुभयो । राजसंस्था संघीयताको पक्षमा छैन भन्ने उहाँको भनाइ छ,’ महतोले भने ।

प्रधानमन्त्रीले जनकपुरमा ‘बलियो संघीयता’ निर्माण गर्ने भनी दिएको सार्वजनिक अभिव्यक्तिलाई व्यवहारमा उतार्न महतोले आग्रह गरे ।

सामाजिक सद्भाव कायम राख्न प्रधानमन्त्रीले थप तदारुकताका साथ पहल गर्नुपर्ने उनको भनाइ छ । ‘मधेसकै जनमतका कारण वर्तमान सरकार दुई तिहाइको अवस्थामा पुगेको हो, त्यसैले जनताको भावना र संघीयतालाई अधिकारसम्पन्न बनाउने कुरामा सरकार गम्भीर हुनुपर्छ’उनले भने ।