बुधबार बिहान तिब्बती क्षेत्रको भोटेकोशीबाट सुरू भएको बाढीले रसुवाको टिमुरे बजारदेखि नुवाकोट, त्रिशुली बजार हुँदै धादिङमा नदी किनार क्षेत्रको कुनै पनि संरचना बाँकी राखेन ।

बुधबार बिहान पौने ९ बजेबाट नेपाल क्षेत्रमा बाढी आएको हो । नुवाकोटका सहायक प्रमुख जिल्ला अधिकारी कृष्णप्रसाद हुमागाईंका अनुसार बाढीले रसुवाका विभिन्न बजार र बस्तीसहित नुवाकोटका पनि विभिन्न क्षेत्रमा क्षति पुगेको छ ।

सहायक प्रमुख जिल्ला अधिकारी हुमागाईंले तुप्चे, ढुंगे, देवीघाट लगायतको क्षेत्रमा बाढीले ठूलो क्षति पुर्‍याएको जानकारी दिए ।

‘बस्ती पूरै बगाएको छ, बैंक, पुल, बजार, बस्ती सबैमा क्षति पुगेको छ,’ उनले भने, ‘इतिहासमै यति धेरै क्षति भएको थिएन । क्षतिको विवरण तत्काल आउँदैन, तर यति भन्छु यो इतिहासकै सबैभन्दा ठूलो क्षति हो ।’

नेपाली सेना, नेपाल प्रहरी र सशस्त्र प्रहरी मिलेर केहीलाई उद्धार गरिएको उनले बताए । उनले भने, ‘अझै धेरै जना बेपत्ता हुनुहुन्छ, उहाँहरूको खोजी भइरहेको छ ।’

धादिङ जिल्ला सदरमुकाम धादिङबेँसी जाने मलेखु-फुर्केखोला सडकखण्डमा रहेको पुल बाढीले बगाएको छ। बाढीले पुल बगाएपछि उक्त सडकखण्डमा आवागमन प्रभावित भएको छ।

पुल बगेसँगै फुर्केखोला आसपासका बासिन्दालाई जिल्ला सदरमुकाम आवतजावत गर्न समस्या भएको छ।